Prezident qarori: «Olmaliq TMK» AJ boshqaruv tizimi yanada takomillashtiriladi

O‘zbekiston Prezidenti Shavkat Mirziyoyev 2017 yil 15 sentabrda Olmaliq shahridagi «Olmaliq TMK» AJ boshqaruv tizimini yanada takomillashtirishga doir PQ-3280 qarorini imzoladi. Qaror matni davlat rahbarining rasmiy saytida e'lon qilindi. 

Qarordan ko‘zlangan maqsad aksiyadorlik jamiyati boshqaruv tizimi hamda shu asosda ishlab chiqarish samaradorligi, mineral-xom ashyo bazasi va ishlab chiqarish quvvatlarini barqaror rivojlantirish, rudalar, rangli, qimmatbaho va nodir metallar, ichki-tashqi bozorlarda barqaror talab bo‘lgan boshqa raqobatbardosh mahsulotlarni qazib olish va ishlab chiqishni kengaytirishdir.  

Qaror bilan «Olmaliq TMK» AJ faoliyatining asosiy vazifa va yo‘nalishlari ham aniqlab berilgan. Xususan,

Tog‘ sanoatini yuritishni tashkil etishning zamonaviy usullarini joriy etishga qaratilgan, mineral-xom ashyo bazasini kengaytirish, rangli va nodir metall konlarini o‘zlashtirish sohasidagi yagona texnik siyosatni amalga oshirish, foydali qazilmalarni qazib olish va ularni qayta ishlash, rangli va nodir metallarni chuqur qayta ishlash asosida eksportga yo‘naltirilgan tayyor mahsulotlarni ishlab chiqish;

Ishlab chiqarishning yuqori, barqaror o‘sish sur'atlarini ta'minlash maqsadida tuzilmaviy qayta tashkil etishlar, modernizatsiya va diversifikatsiyalashni yanada chuqurlashtirish, yuqori qo‘shimcha qiymatli sanoat mahsulotlari eksportini kengaytirish;

Barqaror sarmoyalar, jumladan xorijiy investitsiyalarni jalb etish imkonini beruvchi faol investitsiya siyosatini yuritish, yangi yuqori texnologiyali ishlab chiqarish quvvatlarini ishga tushirishni ko‘zda tutuvchi yirik investitsiya loyihalarini hayotga tatbiq etish;

Ishlab chiqarishni mahalliylashtirish, import o‘rnini bosish va ichki bozorni zarur mahsulotlar va butlovchi jihozlar bilan to‘ldirish jarayonini yanada chuqurlashtirish kabilar belgilangan. 

Bundan tashqari, Prezident qarori bilan ilmiy-tadqiqot ishlarini tashkil etish, ishlab chiqarishga yangi texnologiyalar va innovatsiyaviy ishlanmalarni joriy etish, zamonaviy axborot kommunikatsiya texnologiyalari va dasturiy mahsulotlardan foydalanish ishlab chiqarish va ishlab chiqarilayotgan mahsulotlar tannarxini arzonlashtirish, raqobatbardoshligini oshirish hamda kombinat moliya-xo‘jalik faoliyati shaffofligini ta'minlashga doir masalalar ham belgilab berilgan. 

Qaror bilan kombinat boshqaruvi raisi aksiyadorlarning umumiy majlisi tomonidan saylanishi va O‘zbekiston Respublikasi Prezidenti bilan kelishilgan holda Vazirlar Mahkamasi tomonidan tasdiqlanadi hamda maqomi jihatidan vazirga tenglashtiriladi. 

Shuningdek, «Olmaliq TMK» AJning asosiy ishlab chiqarish bo‘limlari tomonidan ishlab chiqarish tannarxi va xarajatlarini qisqartirish bo‘yicha aniq choralar rejasi - «yo‘l xaritasi» ham ma'qullangan.