Vyacheslav Yervandovich Avakov 25 yil davomida (1991-2016) Islom Karimovning davolovchi shifokori bo‘lib xizmat qilgan, shuningdek ularni qadrdon do‘stlik rishtalari bog‘lab turgan. Islom Abdug‘aniyevich kundalik hayotda qanday inson bo‘lgan, bo‘sh vaqtida nimalar bilan shug‘ullangan, ushbu buyuk shaxs bilan do‘stlik haqidagi eksklyuziv intervyu Islom Karimov Fondining Facebook sahifasi orqali taqdim etildi.
"Birinchi tanishuvimiz rasmiy muhitda o‘tgan - biz Prezident tibbiy xizmatining o‘ziga xos jihatlari haqida suhbatlashganmiz. Mening vazifam Prezident sog‘lig‘ini nazorat qilishdan iborat bo‘lgan. Islom Abdug‘aniyevichga qayerdadir qandaydir tekshiruvlar o‘tkazishni taklif qilar edik, buni amalga oshirish juda qiyin edi - birinchidan, uning bo‘sh vaqti yo‘q edi, ikkinchidan, u maktabda ham, institutda ham sport bilan shug‘ullangan, jismonan baquvvat edi va o‘tkazilgan har qanday tekshiruvlar uning salomatligi yaxshi ekanini ko‘rsatardi.
Ilk kunlardanoq, ya'ni respublikaning endi oyoqqa turayotgan paytlari - u vaqtlar O‘zbekistonni hech kim bilmagan - Karimov davlat rahbari sifatida dunyoning turli mamlakatlariga borib, O‘zbekistonni tanitardi, bu safarlarda unga doim hamrohlik qilardim. Islom Abdug‘aniyevich Niderlandiyada ishbilarmonlar bilan uchrashgan, u yangi mustaqil davlat O‘zbekiston haqida, uning hech qanday tashqi qarzlari yo‘qligi, bizda turli foydali qazilmalar ko‘pligi haqida to‘lib-toshib so‘zlardi. Shunda niderlandiyalik ishbilarmonlardan biri turib, "Bilasizmi, bu yerga siz bilan uchrashishga kelishdan avval xaritadan sizning mamlakatingizni uzoq izladim va topa olmadim" dedi. Islom Karimov bunday vaziyatdan shunday ustalik bilan chiqdiki, qoyil qolmay iloj yo‘q: "Umuman olganda, O‘zbekistonni bilmasligingiz va xaritadan topa olmaganingiz ajablanarli emas, albatta, holbuki, O‘zbekiston - bu besh-oltita Niderlandiya degani", - dedi Karimov. Hammaning yuziga tabassum yugurdi.
Arxiv video: Islom Karimov onalari haqida
O‘zbekistonning endi oyoqqa turayotgan paytida xorijiy safarlar ko‘p bo‘lib, ularning bari juda murakkab edi. Prezident esa ularni yanada murakkablashtirardi, nima uchun? Deylik, 3 kunlik safar rejalashtirilgan, oradagi tanaffuslar inobatga olingan holda, u ana shu tanaffuslarni 50 daqiqagacha qisqartirardi va biz 3 kunlik safarni 2 kunda yakunlab qaytar edik. Bunday tig‘iz grafik - yuqori qon bosimi degani. Orada delegatsiya a'zolari sog‘lig‘idan shikoyat qilardi - kimdir ovqatdan zaharlangan, yana kimnidir qon bosimi bezovta qilgan. U o‘zini psixologik jihatdan ortiqcha yuklab tashlagan va shunday tartibga rioya qilgan, qolganlardan ham shuni talab qilgan. Bu insonning butun hayoti, shiori shunday bo‘lgan.
