Malayziyada KXDR yetakchisining akasini o‘ldirganlikda gumon qilayotganlar ustidan sud boshlandi

Malayziyada Shimoliy Koreya yetakchisi Kim Chen Inning akasi Kim Chen Nam joniga suiqasd qilganlikda gumon qilinayotgan ikki gumondor ustidan sud jarayoni boshlandi. U Shox Olam shahrida boshlandi, deb xabar qilmoqda RIA Novosti Yaponiya OAVga asoslangan holda.

Sud vetnamlik Zoan Txi Xiong va indoneziyalik Siti Aisyani o‘lim jazosiga mahkum etishlari mumkin. Ular 13 fevral kuni Kuala-Lumpur aeroportida KXDRning Kim Chxol nomiga berilgan diplomatik pasport egasiga hujum qilib, kuchli zaharlovchi VX moddasini moyga aralashtirgan holda uning yuziga surkashgan, deb taxmin qilinmoqda.

Sudlanuvchilar 28 yoshli Zoan Txi Xiong va 25 yoshli Siti Aisya o‘z aybiga iqror bo‘lishmagan. Ularning ta'kidlashlaricha, sudlanuvchilarni video-o‘yinda qatnashish uchun yollashgan va ular o‘zlarining harakatlaridan Kuala Lumpur aeroportida halok bo‘lgan kishi kim ekanini bilishmagan ham. 

Tergov jarayonida KXDRga nisbatan gumon paydo bo‘lgan. Ammo Pxenyan buni qat'iy ravishda rad etib kelmoqda. Hodisaga aloqadorlikda gumon qilinayotgan shimoliy koreyaliklar Malayziyani tark etishga ulgurgan.