Qashqadaryoda o‘g‘rilik fosh etildi

Joriy yilning 22 avgust kuni tongi soat 06.00da Qashqadaryo viloyati Koson tumani IIB Qo‘riqlash bo‘limi xodimi serjant Sh.Gulmurodov “Koson yog‘-ekstraksiya” aksiyadorlik jamiyatida xizmat postida qo‘riqlovni amalga oshirayotgan paytida notanish kishilarning xatti-harakatlaridan shubhalanib, zudlik bilan tuman IIB Qo‘riqlash bo‘limi texnik qo‘riqlash markaziga xabar beradi. 

Ushbu xabarga asosan tuman IIB Qo‘riqlash bo‘limi tezkor harakatlanuvchi guruhi xodimlari safdorlar M.Xayitov, M.Mardonov va R.Alloyevlar voqea joyiga o‘z vaqtida yetib borganlarida uch noma'lum shaxs korxonaning markaziy omborxonasining orqa tomonidan 102ta kauchuk moddasi solingan qoplarni “Ural” rusumli mototsikliga joylashtirib, noqonuniy ravishda o‘g‘irlab ketayotgan vaqtlarida daliliy ashyolar bilan ushlanib, tuman IIB navbatchilik qismiga topshirilgan. 

Hozirda mazkur holat yuzasidan tuman IIB Tergov bo‘limi tomonidan jinoyat ishi qo‘zg‘atilib, tergov harakatlari olib borilmoqda.