Anons. Yevropada dam olish kunlaridagi 6 uchrashuv

Yevrokuboklar tugar-tugamas, bugundan Yevropa maydonlarida milliy chempionat o‘yinlari boshlanadi va albatta, ular ichida e'tiborga arzirli markaziy uchrashuvlar juda ko‘p. An'anamizga sodiq qolgan holda, ana shu o‘yinlar haqida qisqacha to‘xtalamiz. 

NAPOLI - INTeR (21 oktabr, 23:45)

O‘tgan haftada markaziy o‘yinlarda kuchli raqiblar ustidan ajoyib g‘alabaga erishgan ikki jamoa bu safar o‘zaro orani ochiq qiladi. Bir necha qiyin o‘yinlarda g‘alaba qozonib, «Inter» ham nihoyat yuqori o‘rinlar uchun da'vogar bo‘la olishini isbotladi. «Napoli» esa, hatto mag‘lubiyat bilan tugagan Manchester safaridan so‘ng ham, yomon fikr uyg‘otmadi. Sarri shogirdlari raqib kim bo‘lishidan qat'i nazar o‘z uslublaridan voz kechmasliklarini isbotladilar. 

«Inter» «Napoli»dan atigi 2 ochko kam to‘plagan xolos, demak g‘alaba milanliklarni jadvalda peshqadamga aylantiradi. «Napoli» esa Yevropadagi kuchli chempionatlar ichida yo‘qotishsiz borayotgan oxirgi jamoa sifatida navbatdagi g‘alabaga intilishi tabiiy. Hatto Chempionlar Ligasi oldidan klub prezidenti asosiy e'tibor Italiya chempionatiga qaratilishi, Manchesterdagi o‘yindan ko‘ra «Inter»ga qarshi o‘yin muhimroq ekanini aytgandi. 

A Seriyada doirasidagi o‘yinlarda, 2011 yildan beri, «Napoli» «Inter»ni o‘z maydonida yutib kelmoqda.  

VALeNSIYa - SeVILYa (21 oktabr, 21:30)

Ushbu mavsumda «Valensiya» nafaqat mag‘lubiyatsiz seriya bilan turnir jadvalida «Barselona»ni ta'qib qilmoqda, balki, juda hujumkor va quvnoq o‘yin namoyish qilyapti ham. Jamoa 8 turda 21 gol urishning uddasidan chiqdi, italiyalik hujumchi Simone Zaza esa, La Ligada o‘tgan oyning eng yaxshi o‘yinchisi deb e'tirof etildi. 

«Sevilya» ham raqibidan u qadar uzoqda bo‘lmasa-da, o‘yin borasida muammolar juda ko‘p. Masalan, 8 o‘yinda atigi 9 gol urilgan, hozircha faqat autsayder jamoalar mag‘lub etilmoqda. Va albatta, Chempionlar Ligasida «Spartak»dan qabul qilingan yirik mag‘lubiyat ham «Sevilya»ning bugungi holatini ifodalab turibdi. 

Ammo baribir, o‘yin yuqori o‘rinlar uchun da'vogar bo‘lgan raqiblar o‘rtasida ekanini, jamoalar tarkib jihatidan bir-biriga juda mosligini e'tiborga olamiz. Qiziq bo‘lishi tabiiy.

EVeRTON - ARSeNAL (22 oktabr, 17:30)

Transfer bozoridagi sarflar bo‘yicha hatto APLda yetakchilardan biri bo‘lgan «Everton»ning ahvoli yaxshi emas. Avvaliga taqvimning noqulayligi haqida aytildi, ammo keyingi o‘yinlarda ham, masalan, «Byornli»dan o‘z maydonidagi mag‘lubiyat, «Brayton»dagi durang ko‘rsatyaptiki, hali ham jamoa o‘ynab ketgani yo‘q. Ko‘p futbolchilar sotib olingani bilan, Lukakuning katta pulga sotib yuborilganini ham e'tiborga olish kerak. Aslini olganda, ko‘p futbolchilar olingani ham murabbiyga vaqt kerakligini ko‘rsatadi. Balki shuning uchun hali ham Ronald Kumanga imkon berishayotgandir. 

Imkon haqida gapirsak, Arsen Vengerda bu borada muammo yo‘q. Venger qoladi, Venger ketadi charxpalagi bir maromda aylanayotganiga yillar bo‘ldi. «Arsenal» o‘z maydonidagi bir qator g‘alabalardan so‘ng, peshqadamlarga yaqinlashib olgandi, ammo «Uotford»da kutilmagan muvaffaqiyatsizlik vaziyatni og‘irlashtirdi. Jamoaning safardagi 4 uchrashuvning 3tasida mag‘lub bo‘lgani endi bot-bot tilga olinmoqda. 

Har ikki jamoa uchun ham g‘alaba zarur, umuman «Everton» va «Arsenal» bahsi doimo qiziq bo‘lib kelgan. Lekin boshqa tarafdan, har ikki jamoa ham kecha, bu o‘yindan ikki kun oldin Yevropa Ligasida maydonga tushishgan. Bu murabbiylar uchun boshog‘riq, lekin biz uchun emas, chunki bunday holatlarda xatolarga va gollarga boy o‘yinning guvohi bo‘lishimiz ehtimoli yo‘q emas.

TOTTeNHEM - LIVeRPUL (22 oktabr, 20:00) 

«Tottenhem» Chempionlar Ligasida «Liverpul»dan bir kun oldin maydonga tushdi. Ammo Pochettino shogirdlarining raqibi «Maribor» emas, «Real», demak bu tomondan imkoniyatni teng baholash mumkin.

Umuman, safardagi o‘yinlarda, hatto Madridda ham bo‘sh kelmayotgan «Tottenhem»ning uy o‘yinlari unchalik ishonchli chiqmayapti. «Uembli»da mavsumdagi ilk g‘alabani ham «Tottenhem» o‘tgan haftada «Bornmut» ustidan minimal hisobda qozondi. «Liverpul»ga esa, uy-safar farqi yo‘q, raqib agar top-klub bo‘lsa ayni muddao. Zero, Klopp qo‘l ostida «Liverpul» top-6 ga qarshi 20 o‘yinda maydonga tushgan bo‘lsa, atigi 2 marta mag‘lubiyatga uchragan xolos. Va bu «Tottenhem» emasdi. 

Aytgancha, Yurgen Kloppning Angliyadagi ilk o‘yini aynan «Tottenhem»ga qarshi «Uayt Hart Leyn»da bo‘lib o‘tganini alohida ta'kidlash joiz. O‘sha o‘yinda hisob ochilmagandi. 

GALATASAROY - FANeRBAHChe (22 oktabr, 21:30)

So‘ngi yillarda Turkiyada «Beshiktosh» lider bo‘lib olgan va buni Yevropada ham ko‘rsatayotgan bo‘lsa-da, turk futbolining eng katta o‘yini aynan mana shu jamoalar o‘rtasida kechadi. Istanbul ikkiga bo‘linadi, deb ham aytish mumkin. 

«Galatasaroy» Yevropada urf bo‘lib qolgan (7 g‘alaba-1 durang-0 mag‘lubiyat) ko‘rsatkich bilan Superligada birinchi o‘rinda bormoqda, «Fenerbaxche» esa, faqat so‘nggi o‘yinlarda o‘ziga keldi va yetakchi guruhga yaqinlashib bormoqda. Bu gaplar ham ortiqcha, xullas, juda keskin va murosasiz o‘yin bo‘lishiga yillar kafolat beradi. 

MARSeL - PSJ (22 oktabr, 24:00)

Bu esa Fransiyaning eng nomdor juftligi. Bugunning urfi «PSJ» bo‘lishi mumkin, ammo bu yo‘llardan Marsel o‘sha 90-yillarda o‘tib bo‘lgan. Bernar Tapi va Frants Bakkenbauerning «Olimpik»ini eslarsiz. Xullas, Chempionlar Ligasida g‘olib chiqqan yagona fransuz jamoasi mana shu sovrin uchun harakat qilayotgan ikkinchi jamoani o‘z maydonida qabul qiladi. 

2011 yilda marselliklar o‘z maydonida «PSJ» ustidan 3:0 hisobida ustun kelgandi. Keyingi mavsumda durang qayd etildi, shunday buyon, keyingi yillarda mehmonlarning qo‘li baland kelmoqda. Bu an'anani buzish oson bo‘lmasligi aniq. Buning ustiga «Marsel» Yevropa Ligasida to‘p surmoqda, ya'ni raqibidan bir kun kam tiklanish vaqtiga ega bo‘ladi. 

BONUS
Bu hafta «Barselona» o‘z maydonida (21 oktabr, 23:45) «Malaga»ni qabul qiladi. «Real» esa, ertasiga xuddi shu vaqtda «Eybar»ga qarshi Madridda to‘p suradi. 

E'tibor bergan bo‘lsangiz, bu hafta katta afishaga ega bo‘lgan uchrashuvlar u qadar ko‘p emas. Ammo tajriba shuni ko‘rsatadiki, aslida, oldindan u qadar qiziq tuyulmagan juda ko‘p o‘yinlar juda gollarga boy va qiziqarli ssenariy hosil qiladi. Shu tufayli sizga, o‘yin tanlamasdan, imkon qadar ko‘proq o‘yinlarni ko‘raverishni maslahat beramiz.