Alli «Real»ni to‘xtatdi, «Siti» Yevropada gegemonlikni boshlamoqda. YeChL oqshomining asosiy voqealari
|19:00 / 02.11.201714 74613 min
1 noyabr oqshomida Yevropa chempionlar ligasining yana 4 guruhida 4-tur uchrashuvlari o‘tkazildi. Bu o‘yinlardan keyin yana ikki jamoa keyingi bosqich masalasini hal qildi, Angliyaning «Manchester Siti» va «Tottenhem» klublari bir kun oldin pley-offga muddatidan oldin chiqib bo‘lgan «PSJ» va «Bavariya» qatoriga qo‘shildi. «Tribuna» tur voqealarini sarhisob qiladi.
Ye guruhi
«Liverpul» birinchi, ammo yana penalti kasofati
«Qizillar» jamoasi o‘tgan turda 7:0 hisobidagi g‘alaba bilan rekord qayd etgan, uy uchrashuvida ham rekord qilishi mumkin edi. Ammo birinchi bo‘limda Yasmin Handanovich darvozasi tomon 13ta zarbadan keyin ham tabloda 0:0 hisobi porlab turgandi. Birinchi bo‘lim yakunlangani haqidagi hakam hushtagi chalinganida Yurgen Klopp shitob bilan tribunalar ostiga kirib ketdi. U kiyim almashtirish xonasida futbolchilarini g‘azab bilan kutib olganiga shubha yo‘q. Ikkinchi bo‘lim boshlanishi bilanoq Aleksandr-Arnoldning mahorati evaziga yuzaga kelgan vaziyatdan foydalangan Muhammad Saloh hisobni ochdi.
Shundan keyin inglizlarda «penalti kasofati» davom etdi. APL jamoalari Chempiionlar ligasida shu vaqtgacha 4 marta penaltini golga aylantira olishmagandi. Beshinchi omadsiz Milner bo‘ldi. «Liverpul»ning penaltisti jamoa sardori Jordan Henderson edi. Ammo bu mavsumda istalgan futbolchi nuqtaga yaqinlashmoqda va xato qilmoqda. Angliya chempionatining oxirgi turida «Liverpul»ning «Haddersfild»ga qarshi o‘yinida Muhammad Saloh 11 metrdan gol ura olmagandi, undan oldinroq «Maribor»ga qarshi safar o‘yinida ham Firmino o‘z imkoniyatidan foydalana olmagan. Umuman, «Liverpul» oxirgi 4 penaltisini golga aylantira olmadi. Milner keyinroq xatosini tuzatib, Emre Janni golli pas bilan ta'minladi, Starrij o‘yinga nuqta qo‘yuvchi golni urdi - 3:0.
«Sevilya» Moskavada bo‘lgani kabi 4-3-3 sxemasini qo‘lladi va «Spartak»ka qanotlardan ham, markazdan ham hujum qildi. Nolito va Sarabiya Yeshchenko va Kombarov juftligini doimiy bosim ostida ushlab turdi, ammo rossiyaliklar maydon markazidan qilingan hujumlarni qaytarib turishdi. Karrera esa Glushakovni oldinga chiqarib, tavakkal qildi. Moskvaliklar jamoasi sardori o‘z pozitsiyasini, tayanch yarim himoyasini tashlab keta boshladi. Sevilyada u «o‘nlik» sifatida o‘ynadi, uning o‘rnida Fernandu harakat qildi. Ammo braziliyalik bu futbolchi raqib jarima maydoniga yo‘llangan noaniq paslari bilan yodda qoldi.
Mavzuga oid
Balki, Fernandu kuchini zarbalar berish uchun saqlagandir – u bir necha marta jarima zarbalarini yaxshi ijro etdi, ammo ispanlar darvozaboni Serxio Riko ham yaxshi o‘ynadi. «Spartak» pozitsion hujumlarda xatolarga yo‘l qo‘yayotganida, raqib hisobni ochdi. Ikkinchi bo‘limda ruslar hisobni tenglashtirish uchun oldinga o‘tishganida ikkinchi gol o‘tkazildi. Mehmonlar o‘yin oxiridagina bitta gol bilan javob qaytarishdi – jarohatdan tuzalgan Ze Luish hisobni qisqartiruvchi golni urdi.
Endilikda guruhda murakkab vaziyat yuzaga kelgan. «Liverpul»da 8, «Sevilya»da 7, «Spartak»da 5 ochko.
21 noyabr. Spartak – Maribor. Sevilya – Liverpul.
F guruhi «Napoli» o‘ziga va Gvardiolaga umid qiladi
«San Paolo»dagi o‘yinning ilk o‘n besh daqiqasi «hujumlar yomg‘iri» bilan o‘tdi, Gvardiola jamoasi maydon egalarining ko‘zini ochirmasdan, pressing uyushtirdi. To‘pga egalik qilish ko‘rsatkichi - 81,38 foizga 18,62 foiz.
Maurisio Sarri shogirdlari «Siti» mudofaasiga 15 daqiqadan keyingina hujum qila boshladi va 21-daqiqada Mertens Insineni zargarona pas bilan ta'minladi va hujumchi o‘z uslubida to‘pni darvozaning olis burchagiga yo‘naltirdi - 1:0.
Bu gol manchesterliklarning g‘azabini keltirdi va jamoa shundan keyin «Napoli» darvozasini 4 bor ishg‘ol etdi. Avvaliga Otamendi odatdagi kabi qanotdan uzatilgan to‘pni boshi bilan darvozaga joylab hisobni tenglashtirdi, ikkinchi gol ham himoyachi tomonidan urildi, aniqrog‘i hujumkor himoyachi. Stouns «Manchester Siti»ning YeChLdagi asosiy to‘purari bo‘lib turibdi (3 gol).
Aguero tarixga kirdi. Uning Italiyada gol urib, klubi tarixidagi eng zo‘r to‘purarga aylanib oldi - 178ta gol. U bu gollarini urish uchun «Manchester Siti» libosida 264 marta maydonga tushgan. Bundan avvalgi rekord Erik Brukka tegishli edi. O‘tgan asrning 30-yillarida o‘ynagan bu futbolchi 494ta o‘yinda 263 gol urishga muvaffaq bo‘lgan. Lekin, qayd etish kerakki, Bruk avvaliga qanot himoyachisi bo‘lgan, keyin markaziy hujumga o‘tib gol urishga kirishgan. Bundan tashqari u 3 marta darvozabon sifatida maydonga chiqqan.
«Napoli» Sarri boshchiligida ilk marta 1 o‘yinda 4 gol o‘tkazdi. To‘rtinchi gol muallifi Sterling uchun bu mavsumdagi o‘ninchi gol bo‘ldi. Neapolliklar ilk marta o‘z maydonida ingliz klubiga yutqazdi.
Jamoa keyingi bosqichga chiqish uchun imkoniyatlarini pasaytirib yuborgan bo‘lsada, Gvardiola jamoasi yordam qo‘lini cho‘zishi mumkin. Inglizlar italyanlarning asosiy raqobatchisi bo‘lib turgan ukrainlarning «Shaxtyor» klubini yengib bersa va «Napoli» qolgan ikki turda 100 foizlik natija ko‘rsatsa, keyingi bosqichga chiqadi.
Endi «konchilar» keyingi 2 turda bir ochko olsa, kifoya qiladi. Niderlandlar esa bu oqshomda Chempionlar ligasida o‘tkazgan gollari sonini 100taga yetkazib qo‘yishdi va antirekord o‘rnatishdi. «Feyyenoord» YeChLda qatorasiga 7 o‘yinda yutqazgan. Yorgensenning kutilmagan goli mehmonlarni dovdiratib qo‘ymadi, 5 daqiqadayoq hisob tenglashtirildi. Shundan keyin mezbonlar himoyasi parchalanib ketdi va Marlos osonlik bilan dubl qayd etdi - 1:3.
21 noyabr. Manchester Siti – Feyyenoord. Napoli – Shaxtyor.
Turk «lochinlari» yanada balandroq parvoz qilib, shu turdayoq keyingi bosqich masalasini hal qilib qo‘yishi mumkin edi. Ammo jarohatlangan bo‘lsada maydonga tushgan «Monako» yetakchisi Lemar 26-daqiqada Roni Lopeshni golli pas bilan ta'minladi.
Leonardu jamoasi tanaffusga 1:0 hisobidagi ustunlik bilan chiqib ketdi. Jamoa shu vaqtgacha YeChLdagi 15ta o‘yinda hisobni ochib, g‘alabani saqlab qolgandi.
Ikkinchi bo‘lim boshida qulay vaziyatga chiqib borgan Balde Keyta imkoniyatdan foydalana olmadi va bu o‘yindagi hal qiluvchi nuqta bo‘ldi. Tezkor qarshi hujumga o‘tgan mezbonlar penalti ishladi va Jyenk To‘sun aniq harakat qilib, hisobni tenglashtirdi.
Agar parallel kechgan uchrashuvda «Leyptsig» safarda «Portu»ni yengganida bu natija, «Beshiktosh»ni durang natijasiga qaramasdan keyingi bosqichga olib chiqqan bo‘lardi. Ammo turkiyalik muxlislar pley-offni nishonlashni keyingi turlarga qoldirishdi.
«Dragau»da portugaliyaliklar a'lo darajada harakat qilishdi. Serjiu Konseysau jamoasi «buqalar»ni tiz cho‘ktirdi. Meksikalik toreador Errera burchakdan uzatilgan to‘pga hammadan baland sakrab hisobni ochdi, Verner ikkinchi bo‘limda hisobni tenglashtirgandi, ammo «ajdarlar»ning standart vaziyatlardagi ustunligi mehmonlar uchun halokatli bo‘ldi. O‘yinda aniq zarbalar bo‘yicha ko‘rsatkichlar teng edi - 12:12. Ammo g‘alaba qozongan «Portu» ikkinchi o‘ringa ko‘tarildi va «Beshiktosh»ni ta'qib etishga kirishdi. Keyingi tur kvartetdagi kartinaga oydinlik kiritadi. Hozirda «Monako» ham ikkinchi o‘rin uchun imkoniyat saqlab qolmoqda.
«Qirollik» klubining afsonaviy «Uembli»ga ilk tashrifiga Maurisio Pochettino alohida tayyorgarlik ko‘rdi. Kichik jarohati tufayli «MYu»ga qarshi o‘ynamagan Keyn va YeChLda 3 o‘yinlik diskvalifikatsiyani o‘tagan Alli Zidan jamoasiga tinchlik bermadi. Birinchi bo‘limdayoq yosh yarim himoyachi «Real»ni ko‘mishga kirishdi.
Ikkinchi bo‘limda u Kazemironi ortda qoldirdi va u bergan zarba rikoshet orqali Kasilya darvozasiga borib tushdi. Alli endi Bekhem va Jyerrard kabi YeChL o‘yinlarida «Real»ga dubl qilgan uchinchi angliyalik futbolchiga aylandi. U shu kuni het-trikka erishishi ham mumkin bo‘lgandi, uning bosh bilan bergan zarbasi darvoza chizig‘idan qaytarildi.
«Real» tajribasiz bokschi kabi oldinga tashlandi, ammo darvozasiga uchinchi gol kelib tushdi, Keyn Eriksenni golli pas bilan ta'minladi. Bu shokka tushiruvchi holat edi, madridliklarning Chempionlar ligasi guruh bosqichida 2012 yilning oktabridan buyon davom etib kelayotgan mag‘lubiyatsiz seriyasi yakunlandi (30 o‘yin).
Amaldagi chempionlar faqat bir gol bilan javob qaytarishdi. Krishtianu Ronaldu «shporlar» darvozasini o‘z faoliyatida o‘ninchi marta ishg‘ol etdi. Ammo u bu jamoaga qarshi o‘yinlarda ilk marta mag‘lub bo‘ldi. Portugaliyalik futbolchi «Real» safida 50-stadionda gol urdi. Ammo bu quruq statistika.
«Borussiya»ning nursiz o‘yinlari Zinedin Zidan jamoasi foydasiga bo‘lmoqda. Lekin jamoaning o‘z o‘yini ideallikdan yiroqlashib ketdi.
Dortmunddagi yig‘i
«Borussiya» D – APOEL – 1:1 Gollar: Rafael Gerreyru, 29 – Pote, 51)
Dortmundliklar shundoq ham faqat mo‘'jiza tufayli pley-offga chiqishi mumkin edi: ikkinchi davradagi barcha o‘yinlarda g‘alaba qozonish va yetakchilarning ochko yo‘qotishidan umid qilish. Peter Bos shogirdlari esa birinchi vazifani o‘zlari uddalay olishmadi.
«Borussiya» Kiprning APOEL klubini yenga olmadi. Ikki o‘yinda ham 1:1.
Dortmund o‘yin davomida 29 marta zarba berdi, to‘pga egalik qilishda 77 foizlik ustunlik namoyish etdi, ammo bu ko‘rsatkichlar foydasiz bo‘ldi.
Endi guruhdan chiqish uchun «Borussiya»ga faqat sehr-jodu yordam berishi mumkin. Jamoa «Tottenhem» va «Real»ni yengishi, Madrid kutilmaganda APOELga yutqazishi kerak.
Lekin, vaziyatga haqqoniy ko‘z bilan qaralsa: keyingi 2 turda «Borussiya» va APOEL Yevropa Ligasi yo‘llanmasi uchun kurashadi (ikki jamoa – 2tadan ochkoga ega).
