Pul savdosining g‘avg‘osi

O‘zbekiston Respublikasi prezidentining shu yil 2 sentabrdagi “Valyuta siyosatini liberallashtirish bo‘yicha birinchi navbatdagi chora-tadbirlar to‘g‘risida”gi farmoni davlatning moliya-iqtisodiyot bozorida jismoniy va yuridik shaxslarga erkin valyuta ayirboshlash imkonini berdi.

Bugungi kunda bozorlar, aeroport va temir yo‘l vokzallarida, bank muassasalari shoxobchalarida aholi va tadbirkorlik sub'yektlari xorijiy valyutalarni ayirboshlashlari uchun ish tartibi joriy etilgan. Ammo shunday imkoniyatlarga qaramasdan, belgilangan qonun-qoidalarning ayrim shaxslar tomonidan buzilishi holatlari hamon uchrab turibdi. Xususan, Yangiyo‘l tuman hududida o‘tkazilgan tezkor tadbirda fuqaro Abror Meliyev (ism-familiyalar o‘zgartirilgan) 100 AQSh dollarini sotayotgan vaqtda qo‘lga olindi. Bundan tashqari, A.Meliyevning yonida yana 50 AQSh dollari, 1000 qozoq tengesi, 1 mln. 400 ming so‘m borligi aniqlanib, ashyoviy dalil sifatida olinib hujjatlashtirildi, deb yozmoqda “Huquq” gazetasi.

Chinoz tumanidagi Yallama QFY hududida o‘tkazilgan tezkor tadbirda esa shu yerda istiqomat qiluvchi fuqaro Dilshod Jo‘rayev 100 ming qozoq tengesini fuqaro Shahlo Komilovadan 2 mln. 450 ming so‘mga sotib olayotgan vaqtda qo‘lga olindi.

Ushbu holatlar bo‘yicha Yangiyo‘l tuman ma'muriy sudi tomonidan aybdorlarga nisbatan jarima jazosi tayinlandi.