Munofiqning ishi: Qashqadaryoda “hojatbaror pochtachi” ushlandi 

Najmiddin Qarshi shahridagi “Samarqand” shohbekatiga keldi-yu, Toshkentga jo‘naydigan kirakash haydovchilarni izlab, atrofga alanglay boshladi, deb yozadi “Huquq” gazetasi.

Bir chetda turgan Jamshid uni biroz kuzatib turgach, shundoq “mijoz”ni boshqa haydovchilar “ilib” ketmasligi uchun yugurib oldiga bordi.

-  Aka, Toshkentga ketasizmi?

-  Yo‘q, ketmayman, - dedi Najmiddin u bilan salomlasharkan. – Poytaxtga “pochta” jo‘natishim kerak edi...

-  Bo‘ldi, aytgan joyingizga yetkazamiz, - dedi Jamshid qat'iy. – Faqat xizmat haqini bersangiz bo‘ldi...

Najmiddinning “pochta”si 1 mln. so‘m pul ekan. U Jamshidga jo‘natma va xizmat haqi bilan birga Toshkentda pulni qabul qilib oladigan kishining telefon raqamlarini ham berdi.

Oradan mashina Toshkentga yetib boradigan muddat o‘tdi hamki, omonat egasining qo‘liga tegmadi. Najmiddin bir necha kun o‘tibgina firibgarga chuv tushganini anglab, boshini changalladi...

Toshkentga qatnaydigan haydovchilardan biri Rahimjon Mustafoyev ham birovning omonatini poytaxtga yetkazish mas'uliyatini zimmasiga olgan edi. Mijozi Asqar Aliqulov uning qo‘liga 578 ming so‘mni sanab berib, azim shahardagi tanishiga yetkazishni so‘ragandi. Biroq nimadir bo‘ldi-yu, Rahimjon o‘sha kuni yo‘lga chiqa olmay qoldi. Boshi qotib o‘tirganida yoniga Jamshid yaqinlashdi. Hozir Toshkentga ketayotganligini, agar mijozlarining “pochta”si bo‘lsa, olib ketishi mumkinligini aytdi. Rahimjon unga mijozining pullarini tutqazib, bir tashvishdan qutulgandek yengil tin oldi. Aslida u tashvishning kattasiga tutilgan ekan. Bu ertasiga ma'lum bo‘ldi. “Hojatbaror” hamkasbining o‘zi ham omonat bilan birga yo‘qolib qoldi...

Jinoyat ishlari bo‘yicha Qarshi shahar sudida bo‘lib o‘tgan sud majlisida bu “hojatbaror pochtachi”ning qilmishlariga oydinlik kiritildi. Sudda Jamshid Ernazarov hamyurtlari bergan omonat pullarni o‘z ehtiyojlariga ishlatib yuborganligini tan oldi. Jabrlanuvchilarga yetkazilgan zararni qopladi.

Sud hukmi bilan Jamshid Ernazarovga oylik ish haqining 15 foizini davlat daromadiga ushlab qolgan holda 2 yil-u 6 oy muddatga axloq tuzatish ishi jazosi tayinlandi.