Avtomobil raqamlari savdosi haqida sms-xabar orqali ma'lumot olish imkoni yaratildi

O‘zbekiston Respublika tovar-xom ashyo birjasi AVTORAQAM savdo platformasida onlayn auksionlar ishtirokchilari uchun “SMS xabar” xizmat turini ishlab chiqdi va joriy etdi.

Mazkur xizmatdan foydalangan holda, avtohavaskorlar avtoraqamlarning savdoga qo‘yilishi bo‘yicha ma'lumotlarni tezkor tarzda olishlari hamda ma'lum lotga obuna bo‘lib, uning holatini muntazam ravishda kuzatib borishlari mumkin.
 
“SMS xabar” xizmati mijozga uni qiziqtirayotgan avtoraqam bo‘yicha savdo vaqtini o‘tkazib yubormaslik va sotib olingan avtoraqam to‘lovini amalga oshirishning aniq vaqti va uni ro‘yxatdan o‘tkazish joyini bilib olish imkonini taqdim etadi. SMS xabarlar xizmatga ulanishda ko‘rsatilgan telefonga kelib tushadi.
 
Birjaning yangi xizmatiga ulanish uchun avtoraqam.uzex.uz veb-saytining mijozlar uchun shaxsiy kabinetida "SMS" sahifasiga o‘tish va ofertani qabul qilish lozim. Xizmat pullik bo‘lib, oylik abonent to‘lovi 10 000 so‘mni tashkil etadi.

O‘zbekistonda chiroyli avtomobil raqamlarini onlayn-auksionlar orqali sotish sentabr oyidan boshlab yo‘lga qo‘yildi. Ushbu onlayn-platforma orqali ilk avtomobil raqami 7,5 mln so‘mga sotilgandi. 

Birjaning savdolarni tashkillashtirish bo‘yicha direktori Aziz Abdug‘aniyevning ta'kidlashicha, jozibador avtomobil raqamlarini sotish orqali 380 mlrd so‘m olinmoqchi.