O‘zbekiston Respublikasi Vazirlar Mahkamasining “O‘zbekkino” Milliy agentligi faoliyatini tashkil etish bo‘yicha qo‘shimcha chora-tadbirlar to‘g‘risida”gi qarori qabul qilindi.
O‘zbekiston Respublikasi Prezidentining “Milliy kinematografiyani yanada rivojlantirish chora-tadbirlari to‘g‘risida” 2017 yil 7 avgustdagi PQ-3176-son qarorini bajarish yuzasidan Vazirlar Mahkamasi qaror qildi:
1. “O‘zbekkino” Milliy agentligi (keyingi o‘rinlarda Agentlik deb ataladi), “O‘zbekfilm” aksiyadorlik jamiyati, “O‘zbekiston Respublikasi ilmiy-ommabop va hujjatli filmlar kinostudiyasi” mas'uliyati cheklangan jamiyatning:
a) Agentlik huzurida “Multiplikatsion filmlar studiyasi” Davlat unitar korxonasini tashkil etish;
b) Agentlik tizimiga kiruvchi:
“O‘zbekiston Respublikasi ilmiy-ommabop va hujjatli filmlar kinostudiyasi’- Mas'uliyati cheklangan jamiyatni “Hujjatli filmlar kinostudiyasi” Davlat unitar korxonasiga aylantirish;
“Yoshlar tajriba-ijodiy 5-studiyasi” Davlat korxonasini “Yoshlar ijodiy tajriba studiyasi” Davlat unitar korxonasi sifatida qayta nomlash haqidagi takliflari ma'qullandi.
2. Quyidagilar:
“O‘zbekkino” Milliy agentligining tashkiliy tuzilmasi 1-ilovaga muvofiq;
“O‘zbekkino” Milliy agentligi to‘g‘risidagi nizom 2-ilovaga muvofiq;
"O‘zbekkino” Milliy agentligi huzuridagi O‘zbekiston kinoarboblari ijodiy uyushmasi ustavi 3-ilovaga muvofiq tasdiqlandi.
3. Belgilab qo‘yilishicha:
Agentlik kinematografiya sohasida yagona davlat siyosatini amalga oshiruvchi davlat boshqaruvi organi hisoblanadi;
Agentlikning markaziy apparati, “Qoraqalpoqkino” agentligi, Agentlikning viloyatlar va Toshkent shahar bo‘limlariga Vazirlar Mahkamasining “Davlat hokimiyati va boshqaruv organlari, sud organlari va notarial idoralari xodimlari mehnatiga haq to‘lash tarif setkalarini joriy etish to‘g‘risida” 1996 yil 12 apreldagi 147-son qarori bilan belgilangan mehnatga haq to‘lash tartibi qo‘llaniladi.
4. Agentlik ikki oy muddatda O‘zbekiston Respublikasi Bandlik va mehnat munosabatlari vazirligi hamda Moliya vazirligi bilan kelishgan holda "Respublika kinofondi’' davlat unitar korxonasi xodimlarining mehnatiga haq to‘lash bo‘yicha razryadlar va shtatlar jadvalini tasdiqlaydi.
