WP: Tramp Meksika bilan chegarada devor qurish uchun 18 mlrd dollar so‘radi

AQSh prezidenti Donald Tramp ma'muriyati Meksika bilan chegarada devor qurishning dastlabki bosqichi uchun kongressdan 18 mlrd dollar ajratishni so‘radi. Ta'kidlanishicha, devor qurilishi 2027 yilda yakuniga yetadi. Bu haqda The Washington Post nashri tegishli hujjatga asoslanib xabar berdi. 

Hujjatga ko‘ra, bu mablag‘lar 508,6 km.lik qo‘shimcha to‘siqni qurish hamda 655 km.lik mavjud to‘siqni mustahkamlash uchun sarflanadi. Agar hammasi risoladagidek ketsa, 2027 yilga kelib AQShning Meksika bilan 3,2 ming km.lik chegarasining yarmidan ko‘prog‘i sun'iy to‘siqlar bilan himoyalanadi.

Bu taklif 2018 yil byudjyeti bo‘yicha kongressda maslahatlashuvlar olib borilayotgan vaqtda bildirildi. Bu moliyaviy yil 2017 yilning 1 oktabrida boshlangan. Tramp 22 dekabrda federal hukumatning 19 yanvargacha moliyalashtirilishi haqida vaqtinchalik rezolyutsiya loyihasini imzolagan. Agar kongressmenlar 19 yanvargacha byudjyet bo‘yicha kelisha olmasalar, federal idoralar faoliyat yuritish uchun mablag‘siz qoladilar. Trampning taklifi demokratlar tomondan tanqid qilingan. 

Meksika bilan chegarada devor qurish Trampning eng muhim saylovoldi va'dalaridan biri hisoblanadi. Tramp bu devorni qurish haqidagi farmonni 2017 yil 25 yanvarida imzolagandi.