Abdulla Aripov ertaga Imomali Rahmon bilan uchrashadi 

Bosh vazir Abdulla Aripov boshchiligidagi O‘zbekiston delegatsiyasi 10 yanvar kuni Dushanbeda savdo-iqtisodiy hamkorlik, shuningdek davlat chegarasining delimitatsiyasi va demarkatsiyasi bo‘yicha O‘zbekiston-Tojikiston Hukumatlararo komissiyalari yig‘ilishi ishida ishtirok etadi.

Ushbu muzokaralarda Tojikiston delegatsiyasiga mamlakat bosh vaziri Qohir Rasulzoda boshchilik qiladi, deb xabar bermoqda «AP» Tojikiston hukumatidagi manbaga tayangan holda.

Manbaning xabar berishicha, ertaga Aripov Tojikiston prezidenti Imomali Rahmon bilan ham uchrashuv o‘tkazadi.

Shuningdek, Abdulla Aripov ertaga O‘zbekiston prezidenti Shavkat Mirziyoyevning Tojikistonga bahor oylari boshiga rejalashtirilgan birinchi rasmiy tashrifiga tayyorgarlik ko‘rish masalasini muhokama qiladi.

Tojikiston Yer tuzish va geodeziya bo‘yicha davlat qo‘mitasi ma'lumotlariga ko‘ra, O‘zbekiston-Tojikiston chegarasining uzunligi 1332 kilometrni tashkil etadi. Umumiy uzunlikdan daryo orqali chegara 105 kilometrga, quruqlikdagi chegara 1227 kilometrga teng.

Uzunligi taxminan 1240 kilometr bo‘lgan umumiy chegaraning delimitatsiyasi va demarkatsiyasi bo‘yicha bitim muvofiqlashtirilgan, imzolangan hamda tasdiqlangan.

«O‘zbekiston-Tojikiston chegarasining taxminan 93 kilometri bahsli bo‘lib qolmoqda, bu bahs yaqin vaqt ichida hal etiladi», - deya aytib o‘tgandi Tojikiston Yer tuzish va geodeziya bo‘yicha davlat qo‘mitasi rahbari Rajabboy Ahmadzoda o‘tgan yilning yozida.

Eslatib o‘tamiz, avvalroq Abdulla Aripov Tojikistonga borishi, prezident rasmiy tashrifiga tayyorgarlik muhokama etilishi xabar berilgandi.