Суд органларини бир жойга жамлаган «​Адолат саройи»​ мажмуаси барпо этилади
03:35 / 10.01.2018
6285
Фото: Fotolia

Судьялик лавозимига илк бор тайинланаётган номзод бўйича туман ва шаҳар жамоатчилиги фикрини ўрганиш тартиби жорий қилинади. Бу ҳақда 9 январдан умумхалқ муҳокамасига тақдим этилган «Фаол тадбиркорлик, инновацион ғоялар ва технологияларни қўллаб-қувватлаш йили» давлат дастури лойиҳасида маълум қилинган. 

Дастур лойиҳасида таъкидланишича, Ўзбекистон Республикасида судьялар мустақиллигини таъминлаш мақсадида судьялар мақомининг ҳуқуқий асосларини такомиллаштириш юзасидан айнан шундай таклиф илгари сурилмоқда.​ Мазкур тадбирни амалга оширишга Судьялар олий Кенгаши, Олий суд, Ўзбекистон судьялар ассоциацияси ҳамда Адлия вазирлиги масъул этиб белгиланган бўлиб, жорий йилнинг 1 апрелига қадар амалиётга киритилиши назарда тутилган.

Шунингдек, 30 июнга қадар, умумий қиймати 100 млрд. сўмга тенг Марказий суд органлари ва муассасаларини ўзида бирлаштирадиган «​Адолат саройи»​ мажмуасини қуриш юзасидан лойиҳа-смета ҳужжатлари тайёрланади.

Марказий суд органлари ва муассасалари фаолияти уйғунлигини таъминлаш мақсадида уларни жойлаштириш бўйича ягона комплекс ​сифатида қурилиши режалаштирилаётган «​Адолат саройи»​ мажмуасига маблағлар Ўзбекистон Республикасининг ривожланиш давлат дастурларини молиялаштириш жамғармаси томонидан ажратилади.​

Бундан ташқари, давлат дастури лойиҳасида суриштирув, тергов ёки суд фаолиятига ҳар қандай кўринишда, турлича воситалар билан аралашганлик учун жавобгарликнинг муқаррарлигини таъминлаш ҳамда мавжуд жазо чораларини янада кучайтириш назарда тутилади.​


Улашинг
Top