Venesuela Milliy assambleyasi hukmatning milliy kriptovalyuta – petroni muomalaga kiritish bo‘yicha qarorini asossiz deb topdi. Shunday mazmundagi qaror yakdillik bilan qabul qilindi, deyiladi qonun chiqaruvchi organning Twitter sahifasidagi xabarda. Ma'lumki, Venesuela parlamenti davlat hukumatiga muxolifat hisoblanadi.
"Ushbu firibgarlik siyosatini hech kim o‘rganmaydi va ma'qullamaydi, - degan deputat Karlos Valero. – Inflyatsiya darajasi 2616 foizga yetib turganida qaysi kriptovalyuta bu muammoni hal eta oladi?".
Ushbu hujjat, albatta hukumatni o‘z qaroridan voz kechishga majbur qila olmaydi. Venesuelaning bir palatali parlamenti 2017 yil iyulida Konstitutsiyaviy assambleya chaqirilganidan so‘ng, o‘zining oliy qonun chiqarish organi maqomini amalda boy berdi.
2018 yil 5 yanvar kuni Venesuela prezidenti Nikolas Maduro 100 mln dona petro milliy kriptovalyutasini muomalaga kiritishga ko‘rsatma berdi. "Har bir petro Venesuela neftining barreli qancha tursa, shunchaga baholanadi", - degan davlat rahbari.
Venesuela bir necha yil mobaynida o‘tkir ijtimoiy-iqtisodiy inqirozni boshidan kechirmoqda. Bunda narx-navoning o‘sishi milliy valyutaning qadrsizlanishi bilan birga yuz bermoqda. Milliy assambleyaga ko‘ra, 2017 yilgi inflyatsiya darajasi 2600 foizdan yuqori bo‘lgan.
