Kobul markazidagi Hindiston elchixonasiga raketa tushdi 

Noma'lumlar tomondan otilgan raketa Afg‘oniston poytaxti Kobulning diplomatik mavzesi Vazir-Akbar-Xondagi Hindiston elchixonasi hududiga tushdi. Hindiston tashqi ishlar vazirligi vakili Ravish Kumar elchixona binosiga uncha katta ziyon yetmaganini ma'lum qilgan. Guvohlarning aytishicha, raketa yerga tushgandan keyin portlagan.  

“Bir muddat avval Kobuldagi elchixonamiz hududiga raketa tushdi va elchixona majmuasining orqa tomonidagi binoga kichik zarar yetkazdi. Yong‘in va jabrlanganlar bo‘lmagan. Elchimizning ma'lum qilishicha, elchixonaning barcha xodimlari xavfsizlikda”, deb aytgan Kumar jurnalistlarga.     

Raketani kim otgani va u qayerdan otilgani haqida hech qanday ma'lumot yo‘q. Afg‘onistonda harakat qiluvchi birorta ekstremistik guruh hujum uchun javobgarlikni o‘z zimmasiga olmagan.