Kruz.uz sayti xodimlari Qorao‘zak tumaniga tashrif buyurib, tuman hokimi Dauletbay Utemuratov bilan suhbatlashdi. Hokim investorlarni jalb qilish uchun nimalar qilinayotgani haqidagi savolga quyidagicha javob qaytardi:
«Hurmatli prezidentimizning Qoraqalpog‘istonga tashrifi chog‘ida belgilab bergan topshiriqlari asosida, bizlar yanvar oyi oxirlarida chet davlatlarga borib, u yerdagi investorlarni jalb qilish haqida rejalashtiryapmiz. Shaxsan o‘zim Vetnam mamlakatiga borib, u yerda sholichilik, baliqchilik va o‘rdakchilik bo‘yicha o‘rganib kelmoqchiman. Albatta u yerga borgandan so‘ng quruq qaytmasligimiz kerak. Vetnamdagi investorlarni qiziqtirib, o‘zimizning tumanimizga olib kelishimiz lozim”.
O‘tgan yili tumanda investorlarni jalb qilish bo‘yicha amalga oshirilgan ishlar haqida D.Utemuratov quyidagilarni ma'lum qilgan:
"Qorao‘zak tumanida 2017 yilda 43 mlrd. 809 mln. so‘mlik investitsiyalar jalb qilindi. Tumanimizda o‘tgan yili ijtimoiy-iqdisodiy kompleks rivojlantirish dasturiga kiritilgan 95 ta loyiha ishga tushirildi. Jalb qilingan 43 mlrd. 809 mln. so‘mlik investitsiyaning 20 mlrd 803 mln so‘mi loyiha tashabbuskorlari mablag‘i, 23 mlrd 6 mln so‘mi esa tijorat banklari kreditlari hisoblanadi. Ushbu loyihalarning ishga tushirilishi tufayli 635 ta yangi ish o‘rni ochildi. Bular shunchaki sonlar emas, real amalga oshirilgan ishlardir", deya ta'kidlab o‘tgan hokim.
