Yigʻilishda Qoraqalpogʻistonda yuqori texnologik tibbiy xizmatlarning koʻlami ham kengayayotgani taʼkidlandi.
Qayd etilishicha, Nukusdagi markaziy shifoxonada jigar va buyrak transplantatsiyasi amalga oshirilmoqda. Orolboʻyi bolalar shifoxonasida 150 turdagi yuqori texnologik tibbiy xizmat koʻrsatilyapti. Shu yil bosh miya, yurak va plastik jarrohlik kabi murakkab yoʻnalishlarda 1,5 mingta operatsiya oʻtkazilgan.
Hududda tibbiy sugʻurta mexanizmi joriy etilgan. Tibbiyot muassasalariga 10 mln dollarlik jihozlar olib berilgan.
Oʻzbekistonda birinchi marta xususiy sheriklik asosida tashkil qilingan Nukus tibbiyot ilmiy akademiyasi soha xodimlari bilimini baholash va malakasini oshirishda metodik markaz boʻlishi maʼlum qilindi. Tibbiyot akademiyasi, Bolalar klinikasi, Onkologiya markazi hamda yangi tashkil etiladigan koʻp tarmoqli shifoxonani yaxlit tizimga birlashtirib, Universitet tibbiy klasteri tashkil qilinadi.
Shuningdek, Moʻynoqqa kelib ishlayotgan shifokorlarga toʻlanayotgan 200 foizgacha oylik ustama 1-yanvardan Boʻzatov va Taxtakoʻpirda ham joriy etiladi.
