Shavkat Mirziyoyev Qoraqalpogʻistonning har bir tumanida aholi turmush sharoitini yaxshilashga xizmat qiladigan loyihalar amalga oshirilayotganini taʼkidladi.
Qayd etilishicha, Boʻzatovda zamonaviy sanatoriy, Nukusda onkologiya va radiologiya markazi, Qoʻngʻirotda bolalar shifoxonasi va tugʻuruqxona ishga tushirilgan. Amudaryo va Toʻrtkoʻlda har biri 2 ming oʻrinli amfiteatr, Nukus shahrida gimnastika markazi va Konservatoriya filiali foydalanishga topshirilgan.
Osiyo taraqqiyot banki bilan 384 mln dollar hisobiga A-380 magistral yoʻlining Qoʻngʻirotdan oʻtgan 240 kilometri toʻliq beton qoplamaga oʻtkazilgan. Kecha yoʻlning Toʻrtkoʻl, Ellikqalʼa va Beruniydan oʻtgan yana 92 kilometrini qurish boshlangan. Loyiha qiymati 233 mln dollar.
Natijada tranzit 1,5 karra oshishi, Toʻrtkoʻlga kirgan yuklar Qozogʻiston chegarasiga bir sutka oʻrniga 10 soatda yetib borishi taʼkidlandi.
Kelasi yil mart oyidan Toshkent – Nukus tezyurar poyezdi qatnovi yoʻlga qoʻyilib, safar vaqti 16 soatdan 7 soatga qisqaradi.
“Tuyamoʻyin” suv tozalash inshootini rekonstruksiya qilish va Qoʻngʻirotdan Moʻynoqqa 100 kilometr ichimlik suv tarmogʻini tortish boshlanadi.
Davlat rahbari Qoraqalpogʻistonda yer, qazilma boyliklar, quyosh va shamol energiyasi, katta yaylovlar mavjudligini qayd etdi. Ana shu imkoniyatlar asosida “resursdan tayyor mahsulotgacha” boʻlgan zanjirni qamrab oladigan yangi sanoat va investitsiya xaritasi yaratiladi.
“Qoʻngʻirot – Qoraoʻzak – Taxiatosh” yoʻnalishi Qoraqalpogʻistonning “yashil sanoat yoʻlagi” – “intellektual iqtisodiyot uchburchagi”ga aylanadi.
Sunʼiy intellekt va data markaz loyihalari uchun tashkil etilgan maxsus zonada 8 mlrd dollarlik 6 ta loyiha amalga oshiriladi.
Mutasaddilarga 1-oktabrgacha besh yillik dastur ishlab chiqib, investorlar uchun 1 gigavatt quvvatli barqaror elektr taʼminotini yoʻlga qoʻyish topshirildi.
