Nukus shahrida Prezident Shavkat Mirziyoyev raisligida Qoraqalpogʻistonni ijtimoiy-iqtisodiy rivojlantirish masalalariga bagʻishlangan yigʻilish boʻlib oʻtmoqda.
Soʻnggi yillarda hudud uchun katta mablagʻ, imtiyoz va sharoitlar yaratilgani qayd etildi. Foyda, yer va mol-mulk soliqlari 2 karra, sanoat uchun elektr tarifi 15 foizga pasaytirildi, ijtimoiy soliq 1 foiz etib belgilangan.
Oʻtgan yili Qoraqalpogʻistonga 1 mlrd 700 mln dollar investitsiya kiritilgan. Bu 2021-yildagidan 22 karra koʻp.
Bu yil Qoraqalpogʻiston iqtisodiyoti eng tez oʻsayotgan hududlardan biriga aylangan. Joriy yilning birinchi yarmida iqtisodiyot 10,2 foiz oʻsib, hudud Toshkent shahridan keyingi ikkinchi oʻrinni egallagan.
Soʻnggi yillarda Qoraqalpogʻistonda 860 megavattli yangi energetika quvvatlari ishga tushirildi. Beruniy va Qoraoʻzakda shamol stansiyalarining qurilishi hisobiga “yashil” energiya ulushi 23 foizga yetgan. Elektr ishlab chiqarish 4 karra oshib, 5 mlrd 330 mln kilovatt-soatni tashkil etgan. Bu aholi va korxonalarning yillik talabidan qariyb 3 barobar koʻpligi taʼkidlandi.
Kecha 7 mlrd dollarlik 47 ta yangi loyiha qurilishiga start berildi. Jumladan, Qoʻngʻirotda 2 mlrd 600 mln dollarlik, quvvati 1,5 ming megavattli shamol stansiyasini qurish boshlandi. Loyiha doirasida 1,5 ming kilometr yuqori kuchlanishli tarmoq va 500 kilovoltli 3 ta podstansiya barpo etiladi.
2030-yilgacha jami quvvati 3 ming 300 megavattli shamol stansiyalari ishga tushirilib, “yashil” energiya ulushi 76 foizga yetkaziladi, 400 megavattli energiya saqlash quvvati yaratiladi.
Qad etilishicha, Qoraqalpogʻiston “yashil” energiya ishlab chiqarish boʻyicha mintaqaning eng yirik markazlaridan biriga aylanadi.
