Qozog‘iston trassalarida isitish punktlari tashkil etiladi

Qozog‘iston bosh vaziri Bakitjan Sagintayev Ostonadagi hukumat yig‘ilishida tegishli idoralarga mahalliy ijro organlari bilan hamkorlikda mintaqalarda haydovchilar va yo‘lovchilar uchun mobil isitish punktlari, issiq ovqat bilan ta'minlashni tashkil etish vazifasini topshirdi. Bu haqda Qozog‘iston bosh vaziri matbuot xizmati xabar bermoqda.

Hukumat yig‘ilishi davomida bosh vazir Sagintayev tegishli idoralarga avariya-qutqaruv brigadalari navbatchiligini tashkil etish, kuchli sovuq haroratda tezkor tibbiy xizmatlarga hamrohlik qilishni ta'minlash vazifasini yukladi. «Barcha xizmatlar uchun eng sovuq davr aniq va bexato o‘tishi kerak», - deya ma'lum qildi Sagintayev.

Respublika shimoliy va sharqiy viloyatlarida kuchli sovuq harorat o‘tgan haftadan beri kuzatilmoqda. Mutaxassislar taxminiga ko‘ra, bunday ob-havo yana bir necha kun davom etadi. Qator mintaqalarda hafta boshidan beri maktablardagi mashg‘ulotlar bekor qilindi. 

Eslatib o‘tamiz, avvalroq Qozog‘istonda ikki avtobusda bo‘lgan O‘zbekiston va Tojikiston fuqarolari qutqarib qolingani xabar berilgandi.