Myanmalik rohingyalarning Bangladeshga qochishlari davom etmoqda

Myanmaning Arakan shtatidagi musulmon rohingyalarning repatriatsiya qilinishi haqidagi kelishuvga qaramasdan, rohingyalar hanuzgacha Arakandagi o‘z uylarini tark etishga majbur bo‘lmoqdalar. 

Ijtimoiy tarmoqlarda Arakanning Rasidaung tumanidan Bangladesh bilan chegaraga kelgan rohingyalar fojiasi haqida so‘zlovchi video joylashtirildi.

Musulmon rohingyalar 15 kundan beri Myanmaning Mangdau shahri atrofidagi Dang posyolkasi yonida qolishga majbur bo‘lmoqdalar. Ularda na ichimlik suvi va oziq-ovqat, na Bangladeshga ko‘chib o‘tish uchun pul bor.

Musulmon rohingyalarning Yevropa kengashi rahbari Xla Kioning “Anadolu” axborot agentligiga ma'lum qilishicha, yuzlab rohingyalar Arakandagi Busidaung shahrini tark etib, Bangladeshga yo‘l olmoqdalar.

Uning aytishicha, xalqaro hamjamiyat bosimiga qaramay, Myanma hukumati rohingyalarni yo‘q qilish rejasidan voz kechmagan.

“Aynan shu sababli Myanma hukumati rohingyalarning erkin harakatlanishini cheklamoqda, ularni daromad manbalaridan uzmoqda, tibbiy xizmat va ta'limdan mahrum qilmoqda. Arakan shtati musulmon ahli uchun ochiq osmon ostidagi qamoqqa aylangan. Ularga qochishdan bo‘lak hech narsa qolmayapti”, deb aytdi Xla Kio.

Associated Press axborot agentligining ma'lum qilishicha, 6 fevralda Singapurda Janubi-Sharqiy Osiyo davlatlari assotsiatsiyasiga (ASeAN) a'zo davlatlar tashqi ishlar vazirlari yig‘ilishi bo‘lib o‘tdi. Yig‘ilishda zudlik bilan Arakandagi inqirozni hal qilish yo‘lini topish talab etildi.

BMTning oxirgi ma'lumotlariga ko‘ra, 2017 yil 25 avgustdan hozirgi kungacha Myanmadan Bangladeshga 655 ming rohingya qochib o‘tgan. 1970-yillarda Arakanda 2 millionga yaqin musulmon yashagan bo‘lsa, hozirda bu raqam 350 mingdan kamroqni tashkil qilmoqda.