Moskva shahrining Zamoskvoretskiy sudi 2018 yil 18 mart kungi prezidentlik saylovlari kunida referendum o‘tkazishni taqiqladi, unda O‘zbekiston birinchi prezidenti Islom Karimovga haykal o‘rnatish masalasi ko‘tarilishi mumkin edi. Bu haqda TASS xabar qildi.
«Sud Yakimanka munitsipal okrugi deputatlarining “Yakimanka munitsipal okrugi hududida mahalliy referendumni o‘tkazish tashabbusi to‘g‘risida”gi qarorini noqonuniy deb tan olish hamda bekor qilishga qaror qildi. Sud qaroriga u yakuniy shaklda qabul qilingan paytdan boshlab 10 kun davomida shikoyat yuborish mumkin», - deya aytib o‘tgan sudya Nelli Rubtsova.
Yakimanka munitsipal okrugi rasmiy saytidagi ma'lumotlarga ko‘ra, okrug deputatlari 25 yanvar kuni 18 martda mahalliy referendumni o‘tkazish va unga O‘zbekiston birinchi prezidenti Islom Karimovga haykal o‘rnatish hamda Karimov xiyobonida favvora o‘rnatish masalasini olib chiqish haqida qaror qabul qilishgan.
Munitsipal okrug rahbari Andrey Morev sud yig‘ilishi yakunida qaror bo‘yicha shikoyat yuborish niyatida ekanini xabar qildi.
