O‘zbekiston futbol assotsiatsiyasi 21 fevral kuni «Bunyodkor» va «Navbahor» klublarini 500 million so‘m miqdorida jarimaga tortdi. Sababi bitta — diskvalifikatsiya qilingan futbolchilar jamoa tarkibida qolgan.
O‘FA rasmiy saytida e'lon qilingan xabarda «Bunyodkor» va «Navbahor» klublari mos ravishda Dilshod Ahmadaliyev va Oybek Qilichevni o‘rtoqlik uchrashuvlarida o‘ynatib yurgani uchun jazolangani aytiladi.
«Navbahor-Lochinlari» klubi futbolchisi Oybek Qilichev bir yil muddatga, «Bunyodkor» futbol klubi futbolchisi Dilshod Ahmadaliyev esa butunlay futboldan chetlatilgandi. Ammo shunga qaramay nomlari yuqorida tilga olingan futbolchilar o‘z klublari tarkibida o‘rtoqlik o‘yinida maydonga tushib yurgan.
O‘zbekiston futbol federatsiyasi (rasmiy saytda aynan federatsiya deb berilgan — Tribuna.Uz izohi) Ijroiya qo‘mitasi Byurosi qarorlarini buzgani uchun Ijroqo‘m Byurosining 2018 yil 21 fevraldagi 6-sonli Qaroriga ko‘ra «Navbahor-Lochinlari» hamda «Bunyodkor» futbol klublarining har biriga 500 million so‘m miqdorida jarima solindi», deyiladi rasmiy xabarda.
Ko‘rib turganingizdek, berilgan rasmiy manbada hech qanday reglament yoki tartib-intizom qoidalari asos qilingani ko‘rsatib o‘tilmagan. Haqli savol tug‘iladi: O‘FA bu qarorga kelishi uchun qanday asosga tayandi? Qaysi mezon asosida jarima miqdorlari belgilandi?
Reglamentni titkilaymiz. Aytgancha, shu o‘rinda, PFL va O‘FA rasmiy saytida reglamentni izlab topish igna bilan quduq qazishdek gapligi futbolga aloqador kishilarning hech biriga sir emas. Amallab topganimiz reglamentning birorta bandida norasmiy uchrashuvda o‘ynagan futbolchi sabab klubni jazolashi haqidagi band topilmadi. Aynan shuncha miqdorda summa belgilanishi haqidaku gapirmasa ham bo‘ladi. Bu birinchidan.
Ikkinchidan, O‘FA rasmiy sayti klublarning o‘rtoqlik uchrashuvida o‘ynagani haqida yozgan. Bizga ma'lumki, o‘rtoqlik uchrashuvlari odatda terma jamoalar o‘rtasida tashkil qilinadi va uning aniq qoidasi va reglamenti ishlab chiqilgan. Rasman o‘rtoqlik uchrashuvi degan nomni olish uchun uchrashuvda 6tadan ortiq o‘zgarish qilish mumkin emas. Klublar o‘rtasidagi yig‘inlar vaqtidagi uchrashuvlarda 6ta emas, o‘nlab o‘zgarishlar bo‘lishini rasmiy saytlarda chiqqan qaydnomalarda ham ko‘rishimiz mumkin. Buni hech qanaqasiga o‘rtoqlik uchrashuvi maqomiga tenglashtirib bo‘lmasligi shundan ham ma'lum. Oddiy tilda tushuntirganda, bu yig‘indagi nazorat uchrashuvlari. Unda jamoada hali rasman bo‘lmagan turli futbolchilar ham sinovdan o‘tish maqsadida tushishidir. Misol uchun, siz, futbolda qobiliyatingiz bor, lekin hech qaysi jamoada o‘ynamaysiz. Sizni ko‘rishmoqchi tushaverasizda o‘sha nazorat o‘yinida. Hech qanday rasmiy qaydnoma, klub a'zosi ekaningiz haqida kartochka ham so‘rashmaydi. Shunday holatda savol tug‘iladi: qariyb mashg‘ulot darajasidagi o‘yinda o‘ynagan futbolchi sabab klubni chetlashtirish qaysi futbol jamiyati rahbarlari uchun berilgan? Qaysi jamiyatda reglamentsiz istagancha qaror chiqarish mumkin, deb ko‘rsatib qo‘yilgan?
