Jahon iqtisodiyoti xakerlar sababli 600 mlrd dollarlik ziyon ko‘rdi

2017 yilda kiberjinoyatchilar jahon iqtisodiyotiga 600 mlrd dollarlik ziyon yetkazishdi. 2014 yilda bu ziyonlar 445 mlrd dollarga baholangan. Bu haqda kiberxavfsizlik bilan shug‘ullanuvchi McAfee kompaniyasi hamda Strategik va xalqaro tadqiqotlar markazi (CSIS) hisobotida aytilgan.

“Kiberjinoyatchilik iqtisodiyotga 600 mlrd dollarga tushadi. Bu miqdor global yalpi ichki mahsulotning 0,8 foizini tashkil qiladi”, deyilgan tadqiqotda.   

Tadqiqotda aytilishicha, banklar kiberjinoyatchilarning “eng katta o‘ljasi” bo‘lib qolmoqda. CSIS’ning katta vitse-prezidenti Jyeyms Lyuisning ta'kidlashicha, dunyoda kiberjinoyatchilik markazlari soni ortmoqda. 

Hisobotda Shimoliy Amerika, Yevropa, Markaziy, Sharqiy va Janubiy Osiyo, Tinch okeani mintaqasi Lotin Amerikasi va Karib havzasi, Afrika va Yaqin Sharq davlatlaridagi kiberjinoyatchiliklar ko‘rib chiqilgan.