IIV Kiberjinoyatlarga qarshi kurashish departamenti tomonidan Toshkent shahrida yirik tezkor tadbir oʻtkazildi. Bu haqda departament axborot xizmati xabar berdi.
Maʼlum qilinishicha, tezkor tadbirda Yashnobod tumanidagi biznes markazlarining birida onlayn qimor oʻyinlariga xizmat koʻrsatuvchi guruh faoliyatiga chek qoʻyilgan. Ushbu guruh kompyuter texnologiyalari sohasida konsultatsiya xizmatlari koʻrsatish niqobi ostida faoliyat yuritgan.
Guruh Oʻzbekiston, Saudiya Arabistoni, BAA, Ummon, Bahrayn, Qatar, Quvayt va boshqa davlatlarning 60 mingga yaqin fuqarolarini onlayn qimor platformalariga jalb qilish hamda ularda qatnashish sharoitlarini yaratib berish xizmatlarini koʻrsatib kelgan.
Bino ichida boʻlimlar qatʼiy taqsimlangan: operatorlar, supervayzerlar, kassachilar, hisobchi-analitiklar va menejerlar oʻzlariga yuklatilgan vazifalarni maxfiy tarzda bajarib kelishgan. Mijozlarni jalb qilishda maxsus dasturiy taʼminot, shifrlangan aloqa va raqamli izlarni yashirish texnologiyalaridan foydalanilgan.
Maxsus operatsiya davomida binodan ulkan infratuzilma ashyoviy dalil sifatida xatlangan. Jumladan, server qurilmalari, kompyuter jamlanmalari, noutbuklar, mobil telefonlar, bank plastik kartalari, pul mablagʻlari va ishga aloqador boshqa ashyoviy dalillar rasmiylashtirib olingan.
Shuningdek, ushbu tuzilma orqali oxirgi 6 oyda 4 mln dollar miqdorida pul mablagʻlari aylanmasi amalga oshirilgani aniqlangan.
Hozirda holat yuzasidan jinoyat ishi qoʻzgʻatilgan. 16 nafar shaxs bilan tezkor surishtiruv va tergov ishlari olib borilgan. Guruhning 11 nafar aʼzosi protsessual tartibda ushlangan.
Qoʻshimcha qilinishicha, jinoyatga bevosita aloqador, masofadan xizmat koʻrsatuvchi shaxslar ham aniqlangan. Hozirda holat yuzasidan tergov harakatlari va tezkor-qidiruv tadbirlari davom ettirilmoqda.
