Koinotda urush bir necha yildan keyinoq yuz beradi – Pentagon

Koinotda urush bir necha yil masalasidir, deb aytdi AQSh harbiy-havo kuchlari shtabi boshlig‘i Devid Goldfeyn. U bu haqda Floridada 34-marta o‘tayotgan Harbiy-havo kuchlari uyushmasi simpoziumi va Texnologiyalar ko‘rgazmasida gapirdi, deb xabar bermoqda Space News.

Harbiy o‘z nutqida AQSh koinot hududida ustunlikka erishishi lozimligini aytgan.

“Biz bir necha yildan keyin koinotdan zarbalar beramiz, deb hisoblayman. Va biz – AQSh harbiy-havo kuchlari bu yangi bahsli hududda jangovar harakatlarni boshqarishi lozim bo‘lgan qo‘shinlar turi hisoblanamiz. Bu – mamlakat bizdan talab qilayotgan narsadir”, deb aytgan Goldfeyn.

Uning fikricha, AQShning o‘t ochish qudratini oshirish uchun barcha yo‘nalishlarda: havoda, yerda, dengizda, kiberhudud va koinotda razvedka hamda kommunikatsiya imkoniyatlarini integratsiya qilish lozim.

Goldfeynning aytishicha, AQSh harbiy-havo kuchlariga qo‘mondonlarning yangi avlodi zarur. 

Nashr ma'lumotlariga ko‘ra, AQSh harbiy-havo kuchlarining 2018 yilgi koinot dasturlari uchun byudjyeti 7,75 mlrd dollarni, ya'ni 2017 yilgiga nisbatan 20 foiz ko‘proqni tashkil qiladi. Keyingi yilda bu qiymatni 8,5 mlrd dollargacha oshirish rejalashtirilgan.