Noqonuniy qurol-yarog‘ egalari aniqlandi

O‘zbekiston Respublikasi Jinoyat Kodeksining 248-moddasiga muvofiq tegishli ruxsatnomasiz o‘qotar qurol, shuningdek o‘q-dorilar, portlovchi moddalar yoki portlatish qurilmalari tayyorlash, olish, olib yurish, saqlash, olib o‘tish yoki jo‘natish jinoiy javobgarlikka tortilishga sabab bo‘ladi.

Ma'lumki, O‘zbekiston Respublikasi Davlat bojxona qo‘mitasi ham O‘zbekiston Respublikasining “Tezkor-qidiruv faoliyati to‘g‘risida”gi Qonunining 10-moddasiga muvofiq tezkor-qidiruv faoliyatini amalga oshiruvchi organ hisoblanadi.

Shunga ko‘ra, Qoraqalpog‘iston Respublikasi bojxona boshqarmasi xodimlari huquqni muhofaza qiluvchi boshqa idoralar vakillari bilan hamkorlikda amalga oshirgan tezkor-qidiruv tadbirlari davomida bir nechta fuqarolar tomonidan qurol-yarog‘larning noqonuniy saqlanayotganligini fosh qilishdi, deb xabar bermoqda Qoraqalpog‘iston Respublikasi bojxona boshqarmasi Ommaviy axborot vositalari bilan aloqalar guruhi.

Nukus tumanida o‘tkazilgan tadbir davomida fuqaro Q.D.ning yashash xonadoni uning roziligi bilan xolislar ishtirokida ko‘zdan kechirilganda, yashash xonadoni orqa tomonida joylashgan molxonasi yonida qamishlar orasiga yashirib saqlab qo‘yilgan, hech qanday hujjatlarsiz 2 dona ov miltig‘i, 23 dona gilza, 34 dona kapsyullarni noqonuniy ravishda saqlanayotganligi aniqlangan.

Shuningdek, Qo‘ng‘irot tumanida o‘tkazilgan tezkor tadbir natijasida, A.A.ning yashash xonadoni uning roziligi bilan xolis guvohlar ishtirokida ko‘zdan kechirilganida kalibri 16 mm. 1 dona bir stvolli ov miltig‘i va 3 dona gilzalarni noqonuniy ravishda yashirgan holda saqlab qo‘yganligi aniqlandi.

Kegeyli tumanida istiqomat qiluvchi fuqaro A.T.ning xonadoni ham amaldagi tartiblarga muvofiq ko‘zdan kechirilganda, bu yerda 1 dona ikki stvolli ov miltig‘i hech qanday hujjatlarsiz saqlayotganligi fosh bo‘ldi.

Qaraqalpaqstan temir yo‘l stansiyasida 324-sonli Volgograd Toshkent yo‘lovchi poyezdi bojxona ko‘rigidan o‘tkazilganida respublika fuqarosi B.P. yo‘lovchi bojxona deklaratsiyasida ko‘rsatilmagan 9 kg. ov miltig‘ining droblarini noqonuniy ravishda Rossiya Federatsiyasidan O‘zbekiston Respublikasiga olib kelayotganligi aniqlandi.

Mazkur aniqlangan holatlar yuzasidan huquqbuzarlarga nisbatan sud tomonidan tegishli jazo choralari qo‘llanildi.

Qoraqalpog‘iston Respublikasi bojxona boshqarmasi tomonidan boshqa huquqni muhofaza qiluvchi organ xodimlari bilan hamkorlikda olib borilgan chora-tadbirlar natijasida qurol-yarog‘ va o‘q-dorilarni bojxona chegaralari orqali noqonuniy ravishda olib o‘tish, bu kabi sovuq qurollarni tegishli ruxsatnomalarsiz o‘z xonadonlarida saqlash bilan bog‘liq bir nechta qonunbuzarlik holatlari fosh qilindi.

Natijada o‘tgan 2017 yil davomida 6 ta o‘q otar qurol, 15 dona o‘q, 103 dona gilza, 10 kg drob, 2124 dona kapsula, 26 gr. porox, 496 dona pnevmatik patronlar, 912 dona pnevmatik o‘qlar kapsulasi, 1 dona gaz to‘pponcha, 13 dona elektroshoker daliliy ashyo tariqasida olib qo‘yildi.