Saudiya Arabistoni valiahd shahzodasi Misrda

Dushanba kuni Misr hukumati uch kunlik tashrif bilan kelgan Saudiya Arabistoni valiahd shahzodasi Muhammad bin Salmonni Suvaysh kanaliga taklif qildi. ArabNews shu haqida xabar berdi.

Qohira markazidagi asosiy ko‘chalarda valiahd shahzoda Salmon va Abdul Fattoh As-Sisiy plakatlarini ko‘rish mumkin. Ular asosiy musulmon va nasroniy muassasalarga tashrif buyurish va Opera teatrida spektakal tomosha qilish maqsadida shu ko‘chalar bo‘ylab harakatlanishdi.

Shahzoda va As-Sisiy kemaga chiqishdan avval kanal ostidan o‘tgan yangi tunnellardan birini ko‘zdan kechirishdi.

Misr Saudiya Arabistonining sarmoyasidan umidvor, zero bu mamlakat investitsiyalari yordamida Qohirada xalqaro transport, logistika va ishlab chiqarish markazlari yo‘lga qo‘yiladi.

Manbaga ko‘ra, tomonlar Suriya va Yamandagi davomli urushlarni, shuningdek Qatarga nisbatan yuzaga kelgan vaziyatni ham muhokama qilishadi. 

Ta'kidlash joizki, Misr - arab dunyosidagi eng aholi ko‘p yashovchi mamlakat. Saudiya Arabistoni esa arab olamidagi eng badavlat davlatlardan biri hisoblanadi.

Ikki mamlakat Qizil dengiz orqali to‘g‘on qurishni va ikki tomondan ham hududlarni rivojlantirishni rejalashtirmoqda.