Kemerovodagi “Zimnyaya vishnya” savdo markazida yong‘in haqida signal olingandan keyin bu haqda ogohlantiruvchi tizimni o‘chirib qo‘ygan qo‘riqchi qo‘lga olindi. Bu haqda Rossiya tergov qo‘mitasi vakili Svetlana Petrenko ma'lum qildi.
25 mart kuni ushbu savdo markazida yuz bergan yong‘inda 64 kishi halok bo‘ldi. Shifoxonalarda 13 kishi qolmoqda.
“Yong‘in bo‘yicha 5 gumonlanuvchi, jumladan xususiy qo‘riqlash korxonasi xodimi ushlanib, so‘roq qilindi”, deb aytgan Petrenko.
Petrenkoning aytishicha, tergovchilar yong‘in markazi joylashgan xonani ijaraga olgan shaxs, savdo markaziga egalik qiluvchi kompaniya texnik direktori, yong‘in signalizatsiyasiga xizmat ko‘rsatgan tashkilot xodimi va rahbarini so‘roq qilganlar.
Ma'lum qilinishicha, qo‘riqchiga nisbatan jiddiy jinoiy jazo tayinlanishi mumkin.
“Qo‘riqchining harakatlari Jinoyat kodeksining “Yong‘in xavfsizligi talablarini buzish” moddasi bo‘yicha tasniflanishi mumkin. Bu jinoyat og‘ir hisoblanadi va uni amalga oshirganlik uchun 7 yilgacha ozodlikdan mahrum etish jazosi tayinlanishini mumkin”, deb aytgan Petrenko.
Kemerovodagi yong‘in Samara ichki ishlar boshqarmasidagi (1999 yil, 57 qurbon), Krasnodar o‘lkasidagi qariyalar uyidagi (2007 yil, 63 qurbon) va Permdagi “Xromaya loshad” klubidagi (2009 yil, 153 qurbon) yong‘inlar bilan bir qatorda Rossiyada oxirgi 100 yil ichida yuz bergan 4 ta yirik yong‘indan biri bo‘ldi.
