Ukraina prezidenti Volodimir Zelenskiy va mahalliy hokimiyat vakillarining maʼlum qilishicha, 21-avgust, juma kuni Kriviy Rixdagi yirik savdo markaziga yarim soat oraligʻida ikki marta dron hujumi uyushtirilgan.
Soʻnggi maʼlumotlarga koʻra, zarbalar oqibatida 15 kishi halok boʻlgan, yana 130 kishi jarohat olgan. Yaralanganlar orasida 23 nafar bola bor. Shuningdek, 29 nafar jabrlanuvchining ahvoli ogʻir ekani, ularning besh nafari bolalar ekani bildirilgan.
Kriviy Rix meri Aleksandr Vilkul mahalliy vaqt bilan soat 15:39 da savdo markaziga zarba berilgani haqida ilk bor xabar bergan. Uning maʼlum qilishicha, hujumdan soʻng binoda yongʻin boshlangan va koʻplab odamlar jabrlangan. Voqea joyida favqulodda qutqaruv ishlari boshlangan.
Oradan koʻp oʻtmay, soat 15:57 da Vilkul savdo markazi binosiga takroriy hujum amalga oshirilganini maʼlum qilgan.
Ukraina prezidenti Volodimir Zelenskiyning bildirishicha, zarba beruvchi dronlar ikki toʻlqinda hujum qilgan. Birinchi zarba va undan keyin kelib chiqqan yongʻindan taxminan yarim soat oʻtgach, ikkinchi zarba berilgan. Zelenskiyning taʼkidlashicha, takroriy hujum qutqaruv xizmatlari ish olib borayotgan paytda sodir boʻlgan.
Dnipropetrovsk viloyati harbiy maʼmuriyati rahbari Aleksandr Ganja esa Kriviy Rixdagi hujumdan keyin viloyatda soʻnggi bir sutka davomida sodir boʻlgan zarbalar oqibatlari haqida maʼlumot bergan.
Uning soʻzlariga koʻra, bir sutka ichida viloyatning toʻrt tumaniga qariyb 60-marta dronlar, artilleriya va aviatsiya bombalari bilan hujum qilingan.
Zarbalar oqibatida koʻp qavatli turar joy binosi, xususiy uylar va avtomobillar ham zarar koʻrgan. Hujumlar yetkazgan zararning toʻliq koʻlami va boshqa oqibatlariga oid maʼlumotlar aniqlashtirilmoqda.
