Termiz xalqaro savdo markazi hududi 1 ming gektargacha kengaytiriladi

Termiz xalqaro savdo markazi faoliyati sezilarli natija bermoqda: o‘tgan yili bu yerga 800 mingdan ortiq Afg‘oniston fuqarosi tashrif buyurgan, eksport hajmi 320 million dollarni tashkil etgan. Endi markazda yirik ishlab chiqarish quvvatlarini yaratish va eksportni keskin oshirish bo‘yicha yangi vazifalar belgilandi.

Foto: Prezident matbuot xizmati

Ma’lum qilinishicha, tadbirkorlar va investorlar faoliyatini kengaytirish, Termiz xalqaro savdo markazi hududida katta ishlab chiqarish quvvatlarini tashkil etish taklifi bildirilgan. Shu munosabat bilan markaz maydoni 1 ming gektarga yetkazilishi belgilandi.

Mutasaddilarga mazkur kengaytirish hisobidan markazdagi eksport hajmini joriy yil 600 million, kelasi yil 1 milliard dollargacha yetkazish, shuningdek qo‘shimcha 10 ming ish o‘rni yaratish topshirildi.

Qayd etilishicha, yangi loyihalar amalga oshirilishi natijasida ham tadbirkorlar faolligi, ham savdo qilish uchun keladiganlar soni bir necha barobar oshishi kutilmoqda. Shu bois markazda qonun ustuvorligini ta’minlash maqsadida maxsus prokuratura va ichki ishlar bo‘limi faoliyati yo‘lga qo‘yiladi.

Shuningdek, endilikda markaz hududidagi tovar savdosi va xizmatlar eksport sifatida baholanadi. Ularga nisbatan qo‘shilgan qiymat solig‘i (QQS) “nol” stavkada qo‘llanishi belgilandi.