Xo‘ja Ilg‘or qishlog‘ida katta masjid quriladi

Qashqadaryo viloyatining Yakkabog‘ tumanida joylashgan Xo‘ja Ilg‘or qishlog‘ida Amir Temur tavalludiga bag‘ishlangan bayram tadbirlari bo‘lib o‘tayotgani avval xabar berilgandi. KUN.UZ muxbiri Qashqadaryo viloyati hokimi va tadbirga tashrif buyurgan xorijiy sayyohlardan biri bilan suhbatlashdi.

Viloyat hokimi Zafar Ro‘ziyevning so‘zlariga ko‘ra, endi bunday sayllar har yili an'anaviy ravishda o‘tkazib kelinadi.

«Endi bunday sayllar har yili an'anaviy ravishda o‘tkaziladi. O‘zbekiston prezidenti tashabbusi bilan Xo‘ja Ilg‘or qishlog‘ida katta masjid quriladi. Shuningdek, sayl uchun maxsus barpo etiluvchi majmua yil - 12 oy davomida turistlar uchun doimiy ravishda turadi. Qashqadaryo viloyatidagi Amir Temur bilan bog‘liq barcha manzilgohlar yanada rivojlantiriladi, ularga sayyohlarni jalb etish bo‘yicha ishlar kuchaytiriladi», - deya aytib o‘tdi Zafar Ro‘ziyev.

Shveytsariyalik sayyoh Ernest Fogelning KUN.UZ muxbiriga bildirishicha, shu paytga qadar O‘zbekistonda 3 marotaba bo‘lgan.

«O‘zbekistonga ketma-ket uchinchi yil kelishim. 75 yoshdaman, O‘zbekistonga rafiqam bilan tashrif buyurdim. Avval Samarqand, Xiva, Buxoro shaharlarida bo‘lgandim. Bu yil Shahrisabzga keldim va safarim sayl kunlariga to‘g‘ri kelib qoldi. O‘zbekiston xalqi ochiq yuz, juda mehmondo‘st ekaniga yana bir bor guvoh bo‘lmoqdaman. Keyingi yil ham albatta sayohat qilish uchun kelaman», - dedi shveysariyalik turist.