Litseylarda imtiyozli ovqatlantirish qanday tashkil etiladi? 

Oliy va o‘rta-maxsus ta'lim vazirligi va Moliya vazirligining qarori bilan Akademik litseylarda imtiyozli ovqatlantirishni tashkil qilish hamda xarajatlarini qisman qoplash uchun ota-onalar to‘lovini to‘lash tartibi to‘g‘risidagi nizom tasdiqlandi. Bu haqda Norma yozmoqda.

Tasdiqlangan talablar idoraviy buysunuvidan qat'iy nazar barcha akademik litseylarga nisbatan tatbiq etiladi, byudjyetdan mablag‘ oluvchi hisoblanmaydigan va qonun hujjatlari bilan alohida tartib o‘rnatilgan akademik litseylar bundan mustasno.

Kim imtiyozli ovqatlanishi mumkin 

Davlat byudjyeti mablag‘lari hisobidan imtiyozli uch mahal ovqatlantirish akademik litseylardan uzoq joylashgan hududlardan qabul qilingan o‘quvchilar (doimiy yashash joyi boshqa tumanda (shaharda) bo‘lgan, akademik litsey yotoqxonasida yashaydigan yoki boshqa turar joylarda ijara asosida yashaydigan o‘quvchilar) uchun tashkil etiladi. Bunda xarajatlar ularning ota-onalari hisobiga har oyda EKIHning 1 baravari miqdorida qisman qoplanadi.

Ijara asosida yashaydigan o‘quvchilar ota-onalarining murojaatlariga asosan har oyda EKIHning 50%i miqdorida xarajatlar qisman qoplangan holda faqat tushlikda ovqatlantirish tashkil etiladi.

Bir o‘quvchi uchun kunlik uch mahal ovqatlantirish xarajati ota-onalar to‘lovini qo‘shib hisoblaganda belgilangan EKIHning 10%igacha miqdorda belgilanadi va quyidagi tarzda taqsimlanadi:

• ertalabki nonushta uchun – kunlik xarajatning 20%idan;
• tushlik uchun - kunlik xarajatning 45%idan;
• kechki ovqat uchun - kunlik xarajatning 35%idan oshmagan holda amalga oshiriladi. 
 
Imtiyozli ovqatlantirish qanday tashkil etiladi 
 
Akademik litseylarda imtiyozli ovqatlantirishni tashkil etish amaldagi nizomga asosan amalga oshiriladi. Litsey va yuridik shaxs yoki yakka tartibdagi tadbirkor (keyingi o‘rinlarda – ta'minotchi) o‘rtasida tegishli shartnoma tuziladi.

Imtiyozli ovqatlantirish uchun har bir o‘quvchiga kursi, guruhi va amal qilish muddati ko‘rsatilgan, surati tushirilgan, direktor imzosi va muhri bilan tasdiqlangan kartochka beriladi. Kartochkani boshqa shaxsga berish taqiqlanadi. Kartochkalar litsey direktori tomonidan tasdiqlangan ro‘yxat asosida o‘quv yilining 10 sentabriga qadar topshiriladi. Yil davomida direktor buyrug‘i bilan ro‘yxatga o‘zgartirish va qo‘shimchalar kiritilishi mumkin. Ijara asosida yashaydigan o‘quvchilar ro‘yxatga kiritilishi uchun tasdiqlovchi hujjat taqdim etishlari darkor.

Imtiyozli ovqatlantirish kartochkasini olgan o‘quvchilarning ro‘yxati ularning F.I.O., guruhi, shaxsiy tartib raqami ko‘rsatilgan holda maxsus jurnalga qayd qilinadi. Jurnalning betlari izchil raqamlangan, ip o‘tkazilib tikilgan hamda imzolangan va muhr bilan tasdiqlangan bo‘lishi lozim. Jurnal ta'minotchiga (mas'ul oshpazga) taqdim etiladi. Jurnal har bir oy uchun alohida yuritiladi. Joriy oy yakunlangandan so‘ng jurnal litseyning buxgalteriyasiga 3 kunlik muddatda topshiriladi.

Ta'minotchi (mas'ul oshpaz) imtiyozli ovqatlantirish kartochkasini ko‘rsatgan o‘quvchilarga jurnalga tegishli belgi qo‘ygan holda ularning imtiyozli ovqatlantirilishini tashkil etadi. Kun yakunida jurnaldagi ma'lumotlarga asosan kunda bajarilgan ishlar dalolatnomasi tuzilib, litsey buxgalteriyasiga taqdim etiladi. Ma'muriyat bilan kelishilgan holda hisob-faktura ta'minotchi tomonidan har kuni, har haftada yoki har oyda taqdim etilishi mumkin.

Imtiyozli ovqatlantirish uchun ota-onalar to‘lovi qanday to‘lanadi

Ota-onalar to‘lovi ota-onalar bilan litsey o‘rtasida tuzilgan shartnomaga asosan har oyning 10 sanasidan kechiktirmasdan to‘lanadi. To‘lov shakli turlicha: naqd pul, plastik karta orqali yoki pul o‘tkazish yo‘li bilan. Ovqatlantirish uchun to‘lovni hisoblash va har bir o‘quvchiga nisbatan uni hisobga olish litsey buxgalteriyasi tomonidan amalga oshiriladi. Agar o‘quvchi kasalligi yoki boshqa sabab tufayli ketma-ket uch kundan ortiq imtiyozli ovqatlantirishdan foydalanmagan taqdirda ota-onalar to‘lovi joriy oyda yoki agar u to‘langan bo‘lsa, keyingi oyda kamayadi. Bunda kasallik tibbiyot muassasasining ma'lumotnomasi bilan tasdiqlanadi. O‘quvchi sababsiz kelmagan hollarda, shuningdek, akademik litseyning ichki tartib-qoidalarini buzishi yoki boshqa huquqbuzarlik qilishi natijasida o‘qishdan chetlatilganda, ota-onalar to‘lovi qaytarilmaydi.

Imtiyozli ovqatlantirish uchun olingan ota-onalar to‘lovi va byudjyet mablag‘laridan belgilanmagan maqsadda foydalanish taqiqlanadi.

Buning uchun javobgarlik litsey direktori va bosh buxgalteri zimmasiga yuklatiladi.

Hujjat 6.07.2018 yildan kuchga kiradi.