Putin Merkel bilan suhbatda Suriyaga zarbalarni keskin qoraladi

Rossiya prezidenti Vladimir Putin GFR kansleri Angela Merkel bilan o‘zaro telefon muloqoti davomida AQSh va uning ittifoqchilarining Suriyaga bergan zarbalarini tajovuzkorlik akti va xalqaro huquqning buzilishi deb atadi. Bu haqda Kreml saytida xabar qilinadi.

«Suriyada va uning atrofidagi vaziyatning keskinlashishi batafsil muhokama qilindi. Rossiya prezidentining ta'kidlashicha, Suriya Arab Respublikasiga qarshi tajovuzkorlik aktini sodir etgan g‘arb davlatlari guruhining xatti-harakati xalqaro huquq normalari, jumladan BMT Nizomini qo‘pol tarzda buzadi, hamda Suriya inqiroziga tinch yo‘l bilan yechim topish jarayoniga jiddiy salbiy ta'sir ko‘rsatadi», - deyiladi xabarda.

Putin va Merkel Suriya bo‘yicha kerakli sa'y-harakatlarni tiklashga ko‘mak ko‘rsatish hamda bu boradagi ikki tomonlama aloqalarni davom ettirishga tayyor ekanini bildirgan.

Eslatib o‘tamiz, avvalroq Buyuk Britaniya bosh vaziri Tereza Mey Rossiyani ayblab chiqqandi.