Asad bombalar ostida muzokaralar stoliga o‘tirmaydi – Rossiya

Rossiyaning BMTdagi doimiy vakili Vasiliy Nebenzya so‘zlariga ko‘ra, Suriya prezidenti Bashar Asadga qarshi harbiy kuchni qo‘llash uni muzokaralarga majburlay olmaydi. Bu haqda RIA «Novosti» xabar bermoqda.

«Suriya hukumati ro‘y bergan barcha voqealardan so‘ng g‘arb davlatlari uchligi [AQSh, Buyuk Britaniya, Fransiya] ko‘rsatmasiga ko‘ra, mamlakatdagi vaziyatga siyosiy yechim topish haqida ijobiy kayfiyatda gaplashishga tayyor ekaniga ishonish qiyin. Agarda vazifa Suriya prezidentini bombalar ostida muzokaralar stoliga o‘tirishga majburlashdan iborat bo‘lsa, buni amalga oshirish imkonsiz. Sababi, bu uning ustidan g‘alaba qozonish va Vashington, London hamda Parij tahdid qilayotgandek uni «harbiy jinoyatchi» sifatida sudga topshirish demakdir», - deya aytib o‘tgan Nebenzya BMT Xavfsizlik kengashining Rossiya tomoni tashabbusi bilan o‘tkazilgan yig‘ilishida.

Eslatib o‘tamiz, avvalroq Putin Merkel bilan suhbatda Suriyaga zarbalarni keskin qoralagandi.