Narpay kanaliga oqayotgan oqova suvlar bartaraf etiladi - Kattaqo‘rg‘on shahar hokimligi

Yodingizda bo‘lsa saytimizda 17 aprel kuni «Oldingdan oqqan suvning qadri yo‘q: Narpay kanaliga najosat oqizilmoqda» sarlavhasi ostida Kattaqo‘rg‘on shahridan oqib o‘tuvchi Narpay kanaliga shahar aholisi va korxonalarining oqova suvlari tashlanayotgani haqida tanqidiy lavha va maqola e'lon qilgan edik.

Ushbu lavha yuzasidan tahririyatimizga Kattaqo‘rg‘on shahar hokimi M.Hoshimov imzosi bilan javob xati keldi.

Shahar hokimining xatida haqiqatdan ham lavhada ko‘rsatilgan kamchiliklar va muammoli holatlar mavjudligi ta'kidlanib, ularni bartaraf etish yuzasidan shaharda ishchi guruh tuzilgani, ishchi guruhga muammoni bartaraf etish uchun shahar hokimligidan zarur mablag‘lar, texnikalar va ishchi kuchi ajratilgani bayon qilingan.

Shahar hokimining tahririyatimizga yo‘llagan xatida ishchi guruh majlisi bayonnomasi va muammoli holatlarni bartaraf etish yuzasidan boshlangan ishlardan fotosuratlar ham ilova qilingan.