Olimlar Yerdagi magnit bo‘ronidan ogohlantirdi

Astronomlar 17 may kuni Yerda besh ballik shkala bo‘yicha ikkinchi darajadagi magnit bo‘roni yuz berishini taxmin qilishmoqda. Bu haqda RIA «Novosti» xabar berdi.

Agentlik ma'lumotiga ko‘ra, may oyidagi nisbatan sokin geomagnit holati fonida bo‘ron G2 darajasida kutilyapti, Yer magnitosferasi esa 7, 8 va 18 may kunlari biroz yomon vaziyatda bo‘ladi.

Ta'kidlanishicha, ikkinchi darajadagi magnit bo‘ronlari energetik tizimlarda kuchsiz fluktuatsiyalarga olib keladi, shuningdek kosmik apparatlarni boshqarish tizimlariga biroz ta'sir ko‘rsatadi. Shu bilan birga, qutb yog‘dulari 60 daraja va undan yuqori baland kengliklarda kuzatilishi mumkin.

Avvalroq, olimlar 2018 yilda Yerda 35taga qadar magnit bo‘roni yuz berishini taxmin qilishgani haqida xabarlar tarqalgandi.