Kim Chen In yadroviy poligonni omma oldida yo‘q qilishga va'da berdi

KXDR yetakchisi Kim Chen In koreyalararo sammitda Pxungeri yadroviy poligoni may oyida yopilishi, uni yo‘q qilish jarayoni omma oldida amalga oshirilishiga va'da berdi. Bu haqida Seul shahrida bo‘lib o‘tgan brifingda Janubiy Koreya prezidenti matbuot kotibi Yun Yon Channing so‘zlariga asoslanib, Yonhap agentligi xabar berdi. 

Kim Chen In jurnalistlar va xavfsizlik sohasi ekspertlarini KXDRga taklif qilishi, ular poligon yopilishini kuzatishlari mumkinligini aytdi. U Shimoliy Koreya poligonlaridagi obektlar yaroqsiz holatga kelgani uchun yo‘q qilinishiga doir taxminlarni rad etdi. 

Janubiy Koreya prezidenti vakilining so‘zlariga ko‘ra, Shimoliy Koreya yetakchisi AQSh bilan tinchlik shartnomasi imzolangan taqdirda, KXDRning yadroviy qurolga ehtiyoji qolmasligini aytgan.

"Odamlar mening Janubiy Koreya, Tinch okeani yoki AQSh tomon yadroviy qurolni ishga soladigan odam emasligimga guvoh bo‘lishadi", - degan Kim Chen In.

"Amerikaliklar bilan ishonchli munosabatlarni yo‘lga qo‘ymoqchi ekanmiz va ular ham bizga urushni tugatishni va'da qilayotgan ekan, yadroviy qurolga ne hojat?", - qo‘shimcha qilgan u.

KXDR yetakchisi Pxenyan 1950-1953 yillardagi Koreya urushi ayanchli tarixi takrorlanmasligi tarafdori ekanini ta'kidlagan.