Putin bugun yana Rossiya prezidenti lavozimini egallaydi

Rossiya prezidenti etib qayta saylangan Vladimir Putin dushanba kuni davlat rahbari lavozimiga kirishadi. Uning siyosiy faoliyatida ushbu inauguratsiya marosimi to‘rtinchi bo‘ladi. Putin Rossiyani kelayotgan olti yil davomida boshqaradi.

Putin 2000 yilda prezident bo‘ldi, 2004 yilda u yangi muddatga qayta saylandi. U 2008 yilgi saylovlarda ishtirok etmadi, sababi, Konstitutsiyaga ko‘ra, bir kishi qatorasiga uch marotaba o‘z nomzodini qo‘yishi mumkin emas. Putin Dmitriy Medvedevni prezidentlikka nomzod sifatida qo‘llab-quvvatlab, 2008 yilning mayida mamlakat bosh vaziri lavozimini egalladi. O‘sha yili Konstitutsiyaga o‘zgartirishlar kiritildi, ularga ko‘ra prezident endi to‘rt emas, balki olti yilga saylanadi.

Putin 2012 yilda yana davlat rahbariga aylandi, 2018 yilda esa saylovlarda rekord ko‘rsatkich bilan g‘alaba qozondi – 56,4 million saylovchi unga o‘z ovozini berdi. Inauguratsiya marosimi zamonaviy Rossiya tarixida yettinchisi bo‘ladi, an'anaga ko‘ra u davlat rahbarining maxsus qarorgohi – Katta Kreml saroyida bo‘lib o‘tadi.

Tadbir tush vaqtiga yaqin boshlanadi va taxminan 50 daqiqa davom etadi. To‘g‘ridan-to‘g‘ri translyatsiya oltita yetakchi telekanal tomonidan efirga uzatiladi. Kreml yaqinida va ichida osma telekameralar uchun maxsus uskunalar o‘rnatib bo‘lingan, ular tasvirni “qush parvozi” balandligidan uzatadi.

Inauguratsiyadan so‘ng lavozimiga kirishgan prezident Davlat dumasiga bosh vazir nomzodini ko‘rib chiqish uchun kiritish huquqiga ega, bu qachon qilinishini esa davlat rahbarining o‘zi hal etadi.

Marosimda ishtirok etuvchilar ro‘yxati prezident protokol xizmati bilan aniqlangan. Marosimda hukumat a'zolari, Duma deputatlari va Federatsiyalar Kengashi vakillari, prezident ma'muriyati rahbarlari, Konstitutsion sud sudyalari, diplomatik korpus xodimlari majburiy tarzda qatnashadi. Putin lavozimiga birinchi marta bo‘ydoq sifatida kirishadi, u sobiq rafiqasi Lyudmila bilan 2013 yilda ajrashgan.