AQSh va Janubiy Koreya prezidentlari Donald Tramp va Mun Chje In Shimoliy Koreyada hibsda ushlab turilgan 3 amerikalikning ozod qilinishini qutlashdi va AQSh davlat kotibi Mayk Pompeoning Pxenyanga tashrifini muhokama qilishdi. Bu haqda Oq uy ma'lum qildi.
Avvalroq Pompeo Shimoliy Koreyaga tashrifi natijalariga ko‘ra, AQShga o‘zi bilan hibsda ushlab turilgan 3 amerikalikni olib keta olganidan xursandligini aytgandi. “Ryonxap” axborot agentligining ma'lum qilishicha, Shimoliy Koreya yetakchisi Kim Chen In Tramp iltimosiga ko‘ra amerikaliklarni afv etish va ozod qilishni buyurgan.
Tramp Kim Chen In bilan may yoki iyun boshida uchrashmoqchi. Uchrashuv Tramp Vashingtonda Janubiy Koreya prezidentini qabul qilgandan so‘ng, ya'ni 22 maydan keyin o‘tishi kutilmoqda.
