Indoneziyada yana portlash sodir etildi

Indoneziyaning Surabaya shahridagi politsiya bo‘limi yonida portlash sodir etildi. Bu haqda Jakarta Globe nashri ma'lum qildi. 

Ta'kidlanishicha, portlash oqibatida bir necha politsiyachi jarohat olgan.

Bu portlash Surabayadagi 2 kun ichidagi 4-portlash bo‘ldi. Voqea joyidan olingan videoyozuvda ikki mototsiklchi politsiya bo‘limi yoniga yaqinlashgach, ulardan birining portlashi aks etgan. 

 
13 may kuni Surabayadagi cherkovlarda sodir etilgan 3 ta portlash oqibatida 11 kishi halok bo‘lgan, 40 kishi jabr ko‘rgan. Birinchi portlash Avliya Mariya katalik cherkovi yonida, qolgan ikkitasi 5 daqiqalik oraliq bilan Diponegoro ko‘chasidagi protestant cherkovida va Arjuno ko‘chasidagi yana bir cherkovda sodir etilgan.

Ma'lum qilinishicha, bu teraktlarning barchasi bir oila a'zolari tomonidan sodir etilgan. Ma'lumotlarga ko‘ra, ushbu oila IShID bilan aloqaga ega bo‘lgan mahalliy terrorchilik guruhi tarkibiga kirgan.