O‘zbekiston Respublikasi Bosh vaziri o‘rinbosari Tanzila Norboyeva Shanxay hamkorlik tashkilotining Birinchi Ayollar forumida ishtirok etish uchun Xitoyga jo‘nab ketdi.Bu haqda Xotin-qizlar qo‘mitasi Axborot xizmati Kun.uz'ga ma'lum qildi.
Joriy yilning 15-18 may kunlari Pekin shahrida o‘tkazilishi rejalashtirilgan «Ayollar kuchining birlashishi, umumiy taraqqiyot sari harakat» mavzusidagi ShHT Birinchi Ayollar forumida ishtirok etayotgan O‘zbekiston delegatsiyasi tarkibiga O‘zbekiston Respublikasi Senati raisi o‘rinbosari Svetlana Artikova, Maktabgacha ta'lim vaziri Agrepina Shin, «Oila» ilmiy-amaliy tadqiqot markazi direktori Dilorom Toshmuhammedova va «Sog‘lom avlod uchun» xalqaro nodavlat xayriya jamg‘armasi raisi Svetlana Inomova kiritilgan.
Forumda asosan uchta masala muhokama etiladi: ayollar va innovatsiya, o‘zaro manfaatli hamkorlik, ayollar va go‘zal olam. ShHT a'zo davlat Hukumat rahbarlarining 16-yig‘ilishida qabul qilingan kommyunikeda e'tirof etilganidek, innovatsiya va raqamli iqtisodiyot - uzoq hamda o‘rta muddatlarda iqtisodiyotni barqaror rivojlanishini ta'minlab beruvchi muhim omillardan biri.
Shuningdek, Ostona shahrida o‘tgan ShHT sammitida ham erkin va xavfsiz iqtisodiyotni yaratish, energotejamkor g‘oyalarni tatbiq etish masalasi ko‘tarilgandi. Yuqorida qayd etilgan masalalar yuzasidan ShHT ayollar forumi tashkil etilmoqda.
Eslatib o‘tamiz, 24 aprel kuni bo‘lib o‘tgan Shanxay hamkorlik tashkilotiga a'zo davlatlar Tashqi ishlar vazirlarining navbatdagi yig‘ilishi Tsindaodagi yirik sammit oldidan hal qilinishi zarur bo‘lgan barcha masalani ko‘rib chiqdi. Unda ishtirok etgan O‘zbekiston Respublikasi Tashqi ishlar vaziri Abdulaziz Komilov Shavkat Mirziyoyev va Xitoy raisi Si Tszinpinning ikki tomonlama uchrashuviga tayyorgarlik ko‘rish yuzasidan xitoylik hamkasbi bilan fikr almashdi.
Ma'lumot uchun, joriy yilning 9-10 iyun kunlari o‘tkazilishi rejalashtirilgan ShHT sammitida 2019-2021 yillarda terrorizm, separatizm va ekstremizmga qarshi kurashish bo‘yicha hujjat, ShHT doirasida 2018-2022 yillarda uzoq muddatli hamkorlik, do‘stlik va yaxshi qo‘shnichilik to‘g‘risidagi shartnoma, tashkilotga a'zo davlatlarning 2018-22 yillarda YuNeSKOda faoliyatiga doir, atrofni muhitni muhofaza qilish konsepsiyasi, shuningdek,epidemiya xavfiga qarshi kurashish kabi hujjatlar imzolanishi kutilmoqda.
