Qalb ro‘zasi – u ham tutiladi, uning ham talablari bor

“Islom nuri” dusturining yettinchi sonida “Qalb ro‘zasi” mavzusida so‘z boradi. Ko‘pchilik uchun birinchi marta eshitilayotgan bu jumlaning asl mohiyati haqda poytaxtning “Islomobod” jome masjidi imom xatibi Abdulhamid Jumanov gapirib berdi.

YouTube'da ko‘rish

Tas-IX'da ko‘rish

Ramazon oyi bir yilda bir marta keladigan oy. Shu bois bu oyga taalluqli mavzular ham takrorlanib keladi. Ramazon oyining ismlari juda ko‘p, ulardan biri “Ramazon shahrut tarbiya” oyi deb nomlanadi. Tarbiya insonning xulqini, odobini go‘zal qiladi. Haromdan tiyilishlikni va Alloh taoloning bo‘yrug‘iga bo‘ysunishlikni o‘rgatadigan tarbiya oyi. 

Alloh subhanohu va taolo muboh qilgan: yeyish, ichish va halol yo‘l bilan shahvatni qondirishlikdan Alloh roziligi uchun tongdan quyosh botguncha tiyilishimiz ro‘za deyiladi. Lekin Rasululloh (s.a.v)ning hadislaridan bizga ma'lum bo‘ladiki, payg‘ambar (s.a.v) aytadilar: “Kimda kim yolg‘on gapini, bo‘htonlarini, tuhmatlarini, shunga o‘xshagan narsalarni tashlamaydigan bo‘lsa, unga amal qilishlikni tashlamaydigan bo‘lsa, shuning ortidan ergashib, shunga muvofiq yashashlikni tashlamaydigan bo‘lsa, Alloh taologa uning taomni, suvni tashlaganligining hojati yo‘q. Bu narsani Alloh huzurida e'tibori yo‘q”.

Demak, yuqorida aytganimizdek yeyish, ichish va halol yo‘l bilan yaqinlikdan tiyilish jismning ro‘zasi bo‘lsa, shu bilan birga, ruhning, qalbning ro‘zasi ham bor. Qalbning ro‘zasi Alloh taolo man qilgan yolg‘on gapirishdan tiyilish. Yolg‘on gapirish mo‘min-musulmon uchun ro‘za bo‘lmagan paytda ham harom qilingan. Undan keyingisi g‘iybat. G‘iybat o‘z birodarining go‘shtini tiriklayin yeyish ekanligi haqida Alloh o‘z kitobida bayon qildi. Payg‘ambarimiz (s.a.v) ham uning katta gunoh ekanligi bayonini keltirdilar.

Xullas, til bilan qilinadigan jamiki gunoh borki, bularning barchasini shariat harom qildi. Ramazon oyi biz uchun imkoniyat, biz uchun fursat. Biz boshqa oylarda g‘iybatdan, chaqimchilikdan, so‘kinishdan tiyila olmadik. Chunki bu gunohlar kishi ko‘ziga yaxshi bo‘lib ko‘rinadi. Lekin Ramazon oyida Alloh taolo bizga bir fursatni, bir imkoniyatni – o‘zgarishlik imkoniyatini beryapti.

Maqola O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mitaning xulosasi asosida tayyorlandi.