Andijon viloyati hokimi o‘rinbosari viloyatning eng katta tumanlaridan biriga hokim etib tayinlandi

Xalq deputatlari Baliqchi tuman Kengashining navbatdan tashqari sessiyasi bo‘lib o‘tdi.

Andijon viloyati hokimi Shuhratbek Abdurahmonov ishtirokidagi sessiyada tashkiliy masala ko‘rib chiqildi.

Tuman hokimi O‘tkirbek O‘ktamjonovich Bektemirov sog‘ligi tufayli ishdan ozod qilingan.

Kun.uz muxbirining xabar berishicha, shu vaqtgacha viloyat hokimining qishloq va suv xo‘jaligi masalalari bo‘yicha o‘rinbosari-qishloq va suv xo‘jaligi boshqarmasi boshlig‘i sifatida ishlab kelgan Jasurbek Odilovich Abdurayimov tumanning yangi hokimiga aylangan.

Jasurbek Abdurayimov 1979 yil Andijon viloyati Baliqchi tumanida dunyoga kelgan. 2000 yili Andijon qishloq xo‘jalik institutini tamomlagan, ma'lumoti bo‘yicha mutaxassisligi - agronom.

U 2001 yildan buyon Qishloq va suv xo‘jaligi vazirligi tizimida faoliyat yuritib kelgan, 2017 yilda Andijon viloyati hokimining qishloq va suv xo‘jaligi masalalari bo‘yicha o‘rinbosari bo‘lgandi. 

Ma'lumot uchun, Jasurbek Abdurayimovning otasi Odiljon Abdurayimov ham o‘z davrida Baliqchi tuman hokimi keyinchalik Andijon viloyat hokimining qishloq xo‘jaligi masalalari bo‘yicha o‘rinbosari lavozimlarida ishlagan

Qayd etish kerakki, Baliqchi tumani Andijon viloyatining hududi jihatidan eng katta tumanlaridan biri hisoblanadi.