Halqa metro yo‘nalishi qurilishini moliyalashtirish summalari o‘zgardi

Toshkentdagi yer usti halqa metro yo‘nalishining qurilishiga 422 million dollar sarflanadi. Bu prezidentning 24 maydagi farmonida belgilab qo‘yilgan, u bilan boshqa hujjatlarga o‘zgartish va qo‘shimchalar kiritildi.

Spot’ning yozishicha, dastlab loyihaga 320,1 million dollar yo‘naltirish rejalashtirilgandi, ammo endi bu raqam 2017 yilning oktabridagi loyihada taklif qilinganidek, 422,3 million dollarga o‘zgartirildi.

Bundan tashqari, loyihaning nomi «elektrlashtirilgan yuqori tezlikdagi ikki yo‘lli halqa temir yo‘li»dan «yer usti halqa metro liniyasi»ga o‘zgartirilishi tasdiqlandi.

Qurilishga ajratiladigan davlat byudjyeti mablag‘lari miqdori o‘zgardi, avval - 25,3 mln dollar bo‘lgan bo‘lsa, endilikda 97,2 mlrd so‘m (13,35 mln AQSh dollariga teng).

Dastlab loyihaga davlat byudjyeti hisobidan 159,8 million dollarlik markazlashtirilgan investitsiyalar yo‘naltirilishi qaror qilingan bo‘lsa (2018-2021 yillarga mo‘ljallangan investitsiya dasturi doirasida), endilikda 208,4 million dollar yo‘naltirish to‘g‘risida qaror qabul qilindi.

Tiklanish va taraqqiyot jamg‘armasi tomonidan ajratilayotgan mablag‘ miqdori ham o‘zgardi - avval 20 million dollar bo‘lgan bo‘lsa, endi 140 million dollar.

Avvalroq «O‘zbekiston temir yo‘llari»ga import qilinadigan uskunalar, xom ashyo, materiallar va butlovchi qismlarni, yo‘lovchi elektropoyezdlarini sotib olish uchun 115 mln dollar taqdim etish rejalashtirilgandi. Endi esa «yo‘lovchi elektropoyezdlari» so‘zlari olib tashlandi, hamda summa deyarli ikki barobarga qisqardi - 60 mln dollargacha.