Qashqadaryoda Janubiy Koreya bilan 15 mln dollarlik yangi qo‘shma korxona ish boshlaydi

Qashqadaryo viloyati delegatsiyasining Koreya Respublikasiga uyushtirgan tashrifi natijasida Koreyaning SGT kompaniyasi hamda «BIG Agro» korxonalari o‘rtasida zamonaviy issiqxonalar va tomchilatib sug‘orish texnologiyalarini O‘zbekistonda ishlab chiqarish bo‘yicha qo‘shma korxona ochish borasida shartnoma imzolandi.

«BIG Agro» MChJ vakili Bobur Abdumavlonovning Kun.uz’ga ma'lum qilishicha, Janubiy Koreyaning nufuzli SGT bilan tuzilgan yirik shartnoma qiymati 15 million AQSh dollarga teng.

Mazkur shartnomaga ko‘ra Janubiy Koreyalik mutaxassislar tomonidan o‘ylab topilgan issiqxonalar konstruksiyasi va tomchilatib sug‘orishga oid eng so‘nggi texnologiyalar asosida mahsulotlar ishlab chiqaruvchi yangi korxona Qashqadaryo viloyatida ish boshlaydi.

Eslatib o‘tamiz, avvalroq «BIG Agro» MChJ tomonidan Qashqadaryo viloyatining Mirishkor tumanida ilk bor achchiq qalampirning kayyen gibridli navi ko‘chatlari yetishtirilib, dala maydonlarga ekilayotgani haqida ham xabar bergan edik.