O‘quvchilarning ta'lim muassasasiga maktab formasida kelishi majburiy qilib qo‘yiladi 

2018/2019 o‘quv yilidan boshlab barcha umumiy o‘rta ta'lim muassasalarida tasdiqlangan maktab formalarining namunaviy shakllari doirasida yagona maktab formasining joriy qilinishini ta'minlaydi;

o‘quvchilarning ota-onalari yoki ularning o‘rnini bosuvchi shaxslar o‘rtasida umumiy o‘rta ta'lim muassasalariga maktab formasida kelishning afzalliklari to‘g‘risida tushuntirish ishlarini olib boradi.

Umumiy o‘rta ta'lim muassasalari o‘quvchilari uchun zamonaviy maktab formasini joriy etish tartibi to‘g‘risidagi nizomga ko‘ra, maktab formasini joriy etishning maqsadi o‘quvchilarning bilimli, odob-axloqli, sog‘lom fikrli, har tomonlama barkamol shaxs bo‘lib yetishishiga ko‘maklashish, o‘zaro tenglik va belgilangan tartib-qoidalarga itoatkorlik hissini uyg‘otish, ularning salomatliklarini muhofaza qilish uchun shart-sharoit yaratish, o‘quvchilar o‘rtasida sog‘lom raqobat muhitini yuzaga keltirishdan iborat.

Quyidagilar maktab formasini joriy etishning vazifalari hisoblanadi:

ta'lim muassasalarida sog‘lom ijtimoiy-psixologik muhitni shakllantirish, yosh avlodga zamon talablari va milliy qadriyatlar asosida ta'lim-tarbiya berishga ko‘maklashish;

o‘quvchilar o‘rtasida o‘zaro ijtimoiy tenglik tamoyillarini qaror toptirish;

ta'lim muassasalarida o‘quvchilarning ichki tartib va odob-axloq qoidalariga to‘liq rioya etishlarini tartibga solish;

o‘quvchilarni milliy va umuminsoniy qadriyatlarga yot bo‘lgan “ommaviy madaniyat” xurujlaridan himoya qilishga ko‘maklashish.

Maktab formasining matosi o‘quvchilarning yoshiga, sanitariya qoidalari, normalari va gigiyena normativlariga to‘liq javob berishi shart.

Ta'lim muassasasi rahbariyati tomonidan o‘quvchilarning ota-onalari yoki ularning o‘rnini bosuvchi shaxslar bilan kelishgan holda O‘zbekiston Respublikasi Vazirlar Mahkamasi tomonidan tasdiqlangan maktab formalarining namunaviy shakllari doirasida maktab formasi shakli belgilanadi.

Maktab formasi ta'lim muassasasi pedagogik kengashining qaroriga muvofiq uch yil muddatga joriy etiladi. Ta'lim muassasalarida joriy etilgan maktab formasini belgilangan muddat davomida o‘zgartirishga yo‘l qo‘yilmaydi.

O‘quvchilar tomonidan maktab formasini kiyishda quyidagi talablarga rioya etilishi lozim:

kiyimlarning o‘ta tor yoki o‘ta keng bichimda bo‘lmasligi;

qizlar uchun yubkaning tizzadan yuqori bo‘lmasligi;

oyoq kiyimlar poshnasining 3 santimetrdan baland bo‘lmasligi;

ko‘ylakning eng yuqoridagi faqat bitta tugmasidan tashqari tugmalarning qadalgan bo‘lishi;

kiyimlarning toza va dazmollangan bo‘lishi.

O‘quvchilarning maktab formasini kiyish tartibiga rioya qilmaslik ta'lim muassasasining ichki tartib-qoidalarini buzish deb baholanadi va bunday o‘quvchilarga quyidagi choralar qo‘llanishi mumkin:

ogohlantirish;

kundalik daftariga qayd etish;

tushuntirish ishlarini olib borish uchun ota-onasini xabardor qilish;

fuqarolarning o‘zini o‘zi boshqarish organlari va ta'lim muassasasidagi yig‘ilishlarda ota-onalar ishtirokida muhokama qilish.

O‘quvchilar tomonidan maktab formasini kiyish tartibiga surunkali tarzda rioya qilmaslik ota-onalarning voyaga yetmagan farzandlarini tarbiyalash va ularga ta'lim berish borasidagi majburiyatlarini bajarmaslik deb baholanadi va ularga nisbatan qonun hujjatlarida belgilangan jazo choralari qo‘llaniladi.