JIB Mirobod tuman sudida Doniyor Turgʻunovga nisbatan yuritilgan jinoyat ishi yuzasidan yopiq sud majlisi nihoyasiga yetdi. Bu haqda Toshkent shahar sudlari matbuot xizmati xabar berdi.
Maʼlum qilinishicha, 2010-yilda tugʻilgan Doniyor Turgʻunov Jinoyat kodeksi 104-moddasi 3-qismining «d» bandi boʻyicha (jabrlanuvchining vafotiga sabab boʻlgan darajada qasddan badanga ogʻir shikast yetkazish) aybdor deb topilgan. Unga Jinoyat kodeksining 85-moddasi tartibida 2 yil-u 4 oy muddatga ozodlikdan mahrum qilish jazosi tayinlangan.
Hukmga koʻra, jazoni oʻtash muddati sudlanuvchiga nisbatan qamoqqa olish ehtiyot chorasi qoʻllangan 2026-yil 27-fevral kunidan boshlab hisoblanadi, yaʼni, mahkum yana 1 yil-u 9 oy muddatni panjara ortida oʻtkazadi.
Raislik qiluvchi sudya taraflarga hukm mazmuni, jinoyat oqibatida oʻtkazilgan moddiy va maʼnaviy zararlarni undirish masalasida fuqarolik tartibida sudga murojaat qilish huquqi hamda sud hukmiga nisbatan shikoyat qilish muddati va tartiblarini tushuntirgan.
Eslatib oʻtamiz, 2026-yil 25-fevral kuni Toshkent shahrining Mirobod tumanida voyaga yetmagan Doniyor Turgʻunov BMW mashinasida yoʻl-patrul xizmati inspektori Hosilbek Eshnazarovni urib yuborgandi. Inspektor ogʻir jarohatlar oqibatida vafot etgan.
Shundan soʻng Doniyor Turgʻunov qamoqqa olingan va unga Jinoyat kodeksining 267-moddasi (avtotransport vositasini olib qochish) va 104-moddasi uchinchi qismi «d» bandi (odam oʻlimiga sabab boʻlgan qasddan badanga ogʻir shikast yetkazish) bilan ayb eʼlon qilingandi. Keyinroq avtomobilni olib qochish moddasi ayblovdan chiqarilgani maʼlum boʻldi.
Marhum kichik serjant Hosilbek Eshnazarov prezident farmoniga koʻra, «Jasorat» medali bilan mukofotlandi va uning oilasiga Toshkent shahridan 3 xonali kvartira berildi
