Ochilboy Ramatov Turkmaniston prezidenti bilan muzokaralar o‘tkazdi

Turkmaniston prezidenti Gurbanguli Berdimuhamedov O‘zbekiston Respublikasi bosh vazirining birinchi o‘rinbosari, «O‘zbekiston temir yo‘llari» AJ boshqaruvi raisi Ochilboy Ramatovni qabul qildi.

Tomonlar savdo-iqtisodiy, transport-kommunikatsiya sohalarida Buyuk Ipak yo‘lini tiklash, energetika va boshqa tarmoqlarda salmoqli salohiyatga ega bo‘lgan ikki tomonlama hamkorlik istiqbollari yuzasidan fikr almashdi.

Shu nuqtai nazardan samarali hamkorlikni yanada kengaytirishning keng istiqbollari mavjudligi ta'kidlandi. Bunga oliy darajada erishilgan kelishuvlar, shu jumladan, joriy yilning aprel oyida Turkmaniston prezidentining O‘zbekiston Respublikasiga davlat tashrifi natijalari yangi turtki berdi.

Yaxshi qo‘shnichilik-gumanitar aloqalarni rag‘batlantirishning ahamiyati ham ta'kidlandi. Bildirilishicha, bugungi kunda Madaniyat kunlari kabi o‘zaro ijodiy tadbirlar muntazam ravishda o‘tkazilmoqda. Ilm-fan va ta'lim sohasidagi davlatlararo hamkorlik, xususan, tegishli hujjatlar bilan qo‘llab-quvvatlangan oliy o‘quv yurtlari orqali kuchaytirilmoqda.