Yakunlarga koʻra, toʻrtta startapga “Hududgazta’minot” bilan pilot loyihalarni amalga oshirish imkoniyati berildi.
Bugungi kunda gaz taʼminoti tizimida xizmat koʻrsatish sifatini oshirish, ish jarayonlarini raqamlashtirish va zamonaviy texnologiyalarni joriy etish boʻyicha yangi yechimlarga ehtiyoj ortib bormoqda.
Shu maqsadda “Hududgazta’minot” AJda Yoshlar ishlari agentligi bilan hamkorlikda StartupFest loyihasining Catalyst dasturi tashkil etildi.
Tadbirda yosh startapchilar, dasturchilar va kiberxavfsizlik mutaxassislari ishtirok etdi. Ishtirokchilarga avvalo kompaniyaning real ish jarayonlari va foydalanilayotgan axborot tizimlari koʻrsatildi.
Shundan soʻng ular tizimdagi mavjud vazifalar bilan tanishib, aniq ish jarayonlari asosida texnologik yechimlar ishlab chiqishga kirishdi.
“Bugun ‘Hududgazta’minot’ aksiyadorlik jamiyatida katta tadbir oʻtkazyapmiz. Oʻzbekistondagi startapchilar, yaʼni IT sohasidagi yosh mutaxassislarni chaqirganmiz.
Bugun ‘Hududgazta’minot’ tomonidan raqamlashtirish boʻyicha amalga oshirilayotgan jarayonlarni koʻrsatamiz. Ishlatayotgan tizimlarimizni koʻrsatamiz, undagi kamchiliklarni aniqlash, rivojlantirish mumkin boʻlgan joylarda yoshlarimizning fikrlarini olib, uni hayotga tatbiq qilmoqchimiz. Oʻylaymanki, bu oʻzining yaxshi natijalarini beradi”, - dedi “Hududgazta’minot” AJ boshqaruv raisi birinchi oʻrinbosari Davron Maqsudov.
Uning taʼkidlashicha, avval ham yoshlar tomonidan gaz taʼminoti tizimida zamonaviy texnologiyalardan foydalanishga qaratilgan turli gʻoyalar bildirilgan.
“Bu asosan hozirgi vaqtda juda muhim hisoblangan big data, sunʼiy intellekt bilan bogʻliq gʻoyalar. Yaʼni bizdagi axborot bazasidan foydalanib, u yerdagi maʼlumotlarni sunʼiy intellekt yordamida tahlil qilish va yaxshi yechimlarni berishga olib keladigan gʻoyalar boʻlgan. Kelgusida bu yangi modullar, yangi platformalarga aylanishi mumkin”, - dedi Davron Maqsudov.
